(އެ ދަލީލަކީ) اللَّه ގެ حضرة ން ފޮނުއްވެވި رسول އެކެވެ. طاهر ކުރައްވާފައިވާ ފަތްފުށްތަކެއް އެ رسول އާ ކިޔަވައިދެއްވަތެވެ. (2)

އެ ދަލީލަކީ، އަލިގަދަ ހެކިކަމުގައިވާ، ފާޅުވެ ބަޔާންވެގެންވާ މުޢުޖިޒާތް ޤުރްއާނާއިގެން އެންމެ ފަހުގެ ނަބީއްޔާ ﷺ ފޮނުއްވުމެވެ. ތިޔަބައިމީހުންނަށް ހިތުން (ނުބަލައި) އެފޮތް ކިޔަވައި ދެއްވަނީ ލިއުއްވަން އަދި ކިއުއްވަން ދެނެވަޑައިނުގަންނަވާ އުއްމިއްޔަ ނަބިއްޔެކެވެ. ﴿يَتْلُوا۟ صُحُفًا مُّطَهَّرَةً﴾ ބާޠިލު ކަންކަމުންނާއި، ކާފިރުކަމާއި ޝިރުކުންނާއި، ދޮގު ބުހުތާނުން ޠާހިރުކުރައްވާފައިވާ ފޮތެވެ. މާތް ﷲ އެކަލާނގެ ރަސޫލާ ﷺ އަށާއި، އެކަލޭގެފާނު ގެންނެވި ފޮތަށް ﴿بَيِّنَةُ ﴾ އޭ ވަޙީކުރެއްވީ އެކަލޭގެފާނުގެ ނަބީކަމާއި ރަސޫލުކަން ފުރިހަމަޔަށް ބަޔާންވެ ފާޅުވެގެން ވާތީއެވެ. ފަހެ، އެކަލޭގެފާނަކީ އުއްމިއްޔަ ނަބިއްޔެކެވެ. އެކަލޭގެފާނު ލިއުއްވަން އަދި ކިޔަވައިވިދާޅުވަން ދެނެވަޑައިނުގަންނަވައެވެ. އެކަލޭގެފާނު އެބައިމީހުންގެ ގާތަށް ވަޑައިގަތީ މުޢުޖިޒާތެއް ކަމުގައިވާ ފޮތަކާއިގެންނެވެ. އެކަލޭގެފާނު ވަނީ އެފޮތް ހިތްޕުޅުން ދަސްކުރައްވާފައެވެ. މިއީ އެކަލޭގެފާނު ތެދުކަމުގެ އެންމެ ފާޅުކަން ބޮޑު ދަލީލެވެ. އެކަލާނގެ ވަޙީކުރައްވާފައިވާ ފަދައިންނެވެ. ﴿وَمَا كُنتَ تَتْلُوا۟ مِن قَبْلِهِۦ مِن كِتَـٰبٍ وَلَا تَخُطُّهُۥ بِيَمِينِكَ ۖ إِذًا لَّٱرْتَابَ ٱلْمُبْطِلُونَ * بَلْ هُوَ ءَايَـٰتٌۢ بَيِّنَـٰتٌ فِى صُدُورِ ٱلَّذِينَ أُوتُوا۟ ٱلْعِلْمَ ۚ وَمَا يَجْحَدُ بِـَٔايَـٰتِنَآ إِلَّا ٱلظَّـٰلِمُونَ﴾ (އަދި އޭގެކުރިން ކަލޭގެފާނު އެއްވެސް ފޮތެއް ކިޔަވައިވިދާޅުވެއެއް ނޫޅުއްވަމުއެވެ. އަދި ކަލޭގެފާނުގެ އަތްޕުޅުން އެއްވެސް ފޮތެއް ނުލިޔުއްވަމުއެވެ. އެކަން އެހެންވީނަމަ، ކާފިރުން ޝައްކުކުރީހެވެ. * އަދި ކިއެއްތަ! އެއީ ޢިލްމު ލިބިގެންވާ މީހުންގެ ހިތްތަކުގައި ބަޔާންވެގެންވާ އާޔަތްތަކެކެވެ. އަނިޔާވެރިން ނޫނީ، ތިމަންރަސްކަލާނގެ އާޔަތްތަކާ ދެކޮޅެއް ނަހަދާނެތެވެ.) ދެން އެކަލާނގެ ވަޙީކުރައްވަނީ

ސީދާވެގެންވާ حكم ތައް، އެ ފަތްފުށްތަކުގައި ވެއެވެ. (3)

އެކަލޭގެފާނުގެ މައްޗަށް ބާވައިލެއްވި އެ ފަތްފުށްތަކުގައި ވަނީ ސީދާވެގެންވާ ޙުކުމްތަކާއި، ތެދު ޚަބަރުތަކާއި، ފުރިހަމަ ޝަރީޢަތްތަކެވެ. އެއީ އެންމެ މޮޅަށް ދެނެވޮޑިގެންވާ، ޙިކްމަތްވަންތަ ރަސްކަލާނގެ ބާވައިލެއްވުން ކަމުގައި ވާތީއެވެ. މިއާޔަތުގައި ﴿كُتُبٌ﴾ ގެ މާނައަކީ ޙުކުމްތަކާއި، މާތް ﷲ އެކަލާނގެ އަޅުތަކުންގެ މައްޗަށް ފަރުޟު ކުރައްވާފައިވާ ކަންކަމެވެ. ﴿قَيِّمَةٌ﴾ އޭ ވަޙީކުރެއްވީ މާތް ﷲ ކުރިން ބާވައިލެއްވި ހުރިހާ ފޮތެއްގެ މޭވާތައް ޤުރްއާނުގައި ވާތީއެވެ. މިގޮތުން ޤުރްއާނުގައި ވާހަކަތަކާއި، ޙުކުމްތަކާއި، ޝަރީޢަތްތަކާއި، ނަސޭހަތްތަކާއި، ނަހީތައް ހިމެނެއެވެ. އިންސާނުންގެ ސާހިބާ ﷺ ޤުރްއާން ސިފަކުރައްވާފައި ވަނީ މިފަދައިންނެވެ. " كِتَابُ اللَّهِ فِيهِ نَبَأُ مَا كَانَ قَبْلَكُمْ وَخَبَرُ مَا بَعْدَكُمْ وَحُكْمُ مَا بَيْنَكُمْ هُوَ الْفَصْلُ لَيْسَ بِالْهَزْلِ مَنْ تَرَكَهُ مِنْ جَبَّارٍ قَصَمَهُ اللَّهُ وَمَنِ ابْتَغَى الْهُدَى فِي غَيْرِهِ أَضَلَّهُ اللَّهُ ........" (جامع ا لترمذي، كتاب فضائل القرآن عن رسول الله صلى الله عليه وسلم) (މާތް ﷲގެ ފޮތުގައި ތިޔަބައިމީހުންގެ ކުރީގެ ކަންކަމުގެ ވާހަކަ ވެއެވެ. ތިޔަބައިމީހުންނަށް ވުރެ ފަހުން ވާނެ ކަންކަމުގެ ޚަބަރު ވެއެވެ. ތިޔަބައިމީހުންގެ މެދުގައި ޙުކުމްކުރާނެ ގޮތް ވެއެވެ. އެއީ ޙައްޤާއި ބާޠިލު ވަކިކުރާ ފޮތެވެ. އެއީ ސަމާސާއެއް ނޫނެވެ. މާތް ﷲ އެފޮތް ދޫކޮށްލި ޖައްބާރަކު ނެތިކުރައްވާނެއެވެ. މާތް ﷲ އެފޮތް ނޫން އެއްޗަކުން ތެދުމަގު ހޯދަން އުޅޭ މީހާ މަގުފުރައްދަވާނެއެވެ.....) (ޖާމިޢުއް ތިރްމިޛީ، ޙަދީޘު: 3153) ދެން، އަހުލުކިތާބީން އެކަލޭގެފާނުގެ ރަސޫލުކަން ޤަބޫލުނުކުރި ސަބަބު ބަޔާންކުރައްވަމުން މާތް ﷲ ބަޔާންކުރައްވަނީ އެބައިމީހުން އެކަމަށް ދެކޮޅުހެދީ ޙަސަދަވެރިކަމާއި ގޮތް ދޫނުކުރުމުގެ ސަބަބުން ކަމުގައެވެ. އެހެންކަމުން، އެކަލާނގެ ވަޙީކުރައްވަނީ

އަދި ފާޅުވެގެންވާ ދަލީލު، އެއުރެންގެ ގާތަށް އައުމަށްފަހުގައި މެނުވީ، ފޮތް ލިބުނު މީހުން ބައިބައިވެގެން ނުދެތެވެ. (4)

ޙައްޤު ބަޔާންވެ، އެކަލޭގެފާނާބެހޭގޮތުން އެބައިމީހުންގެ ފޮތްތަކުގައި އައިސްފައިވާ ވާހަކަތައް ތެދުކަމުގެ ދެބަސްނުވެވޭނޭ ދަލީލުތައް ހާމަވުމަށް ފަހުގައި މެނުވީ، މުޙައްމަދު ﷺ ގެ ރަސޫލުކަމާ މެދުގައި ޔަހޫދީންނާއި، ނަޞާރާއިން ދެބަސް ނުވެއެވެ. އެހެންކަމުން އެބައިމީހުންގެ ކާފިރުވުމުކީ ދެކޮޅުހެދުމާއި ގޮތްދޫނުކުރުމުން ވީ ކާފިރުވުމެކެވެ. އެކަލާނގެ ވަޙީކުރައްވާފައިވާ ފަދައިންނެވެ. ﴿فَلَمَّا جَآءَهُم مَّا عَرَفُوا۟ كَفَرُوا۟ بِهِۦ ۚ فَلَعْنَةُ ٱللَّـهِ عَلَى ٱلْكَـٰفِرِينَ﴾ (ދެން އެއުރެންނަށް އެނގިފައިވާ ޙައްޤު ގޮތް އެއުރެންނާހަމަޔަށް އައިހިނދު އެއަށް އެއުރެން ކާފިރުވޫއެވެ. ފަހެ، ކާފިރުންގެ މައްޗަށް اللَّه ގެ ލަޢުނަތް ހުށްޓެވެ.) އަނެއްކޮޅުން، ޔަހޫދީންނާއި ނަޞާރާއިން މާތް ﷲގެ ޙައްޤު މަގުން އެއްކިބާވުމުން، އެބައިމީހުން ވަނީ އެބައިމީހުންގެ ފޮތްތަކާވެސް ޚިލާފުވެފައެވެ. ފަހެ، ޢުޒައިރު عليه السلام އަކީ މާތް ﷲގެ ދަރިކަލެއް ކަމަށް ޔަހޫދީން ދަޢުވާކުރިއެވެ. އަދި ނަޞާރާއިން އަލްމަސީޙު عليه السلام އަކީ މާތް ﷲ ގެ ދަރިކަލެއް ކަމުގައި ބުނެ، ތިންބަޔަށް ވާ އިލާހު އެބައިމީހުން ޤަބޫލުކުރިއެވެ. އެއީ ޢީސާ عليه السلام އެބައިމީހުންނަށް ގެނެސްދެއްވި، މާތް ﷲއަށް އަޅުކަން ޚާލިޞްކުރުމަށް ބުނާ ޢަޤިދާއާ މުޅިން ޚިލާފު، ބުދަށް އަޅުކަންކުރާ މީހުންގެ އަޤީދާއެކެވެ. އެހެންކަމުން، އެބައިމީހުންގެ އެ ޢަމަލާމެދު ރުހިވޮޑުނުގަތުން ހާމަކުރައްވަމުން މާތް ﷲ ވަޙީކުރައްވަނީ

باطل މަގުން އެއްކިބާވެތިބެ، اللَّه އަށް އަޅުކަން خالص ކުރާ حال، اللَّه އަށް އަޅުކަންކުރުމަށާއި، ނަމާދު قائم ކުރުމަށާއި، ޒަކާތްދިނުމަށް މެނުވީ، އެއުރެންނަށް އަމުރުކުރައްވާފައެއް ނުވެތެވެ. އަދި ސީދާވެގެންވާ دين އަކީ އެއީއެވެ. (5)

ހަމައެކަނި ކީރިތިވަންތަ މަތިވެރިވަންތަ ﷲއަށް އަޅުކަންކޮށް، އެކަލާނގެއަށް އަޅުކަން ޚާލިޞްކޮށް، އެކަލާނގެ ފިޔަވައި އެހެން ފަރާތަކަށް އަޅުކަންނުކުރުމަށް މެނުވީ ތައުރާތާއި އިންޖީލުގައި އެބައިމީހުންނަށް އަންގަވާފައި ނުވެއެވެ. އެހެންނަމަވެސް އެބައިމީހުން ބަދަލުކޮށް، އޮޅުވާލިއެވެ. ދެން، އެބައިމީހުން ޢުޒައިރު عليه السلام އަށް އަޅުކަންކުރިއެވެ. އަދި އަލްމަސީޙު عليه السلام އަށް އަޅުކަންކުރިއެވެ. މާތް ﷲއަށް ދަރިންނާއި ޝަރީކުން ލިއެވެ. އަދި އަޙްބާރުންނާއި ރާހިބުން މަގުފުރެދުމަށް ގޮވައިލުމުން އެބައިމީހުންނަށް ކިޔަމަންވިއެވެ. އެކަލާނގެ ވަޙީބަސްފުޅު ﴿حُنَفَآءَ﴾ ގެ މާނައަކީ ބާޠިލު ދީނުން ޙައްޤު ދީނުގެ ފަރާތަށް ލެނބުމެވެ. އެއީ ރަޙްމާނުވަންތަ ރަސްކަލާނގެ މިތުރު އިބްރާހީމް عليه السلام ގެ ދީނެވެ. އެންމެ ފަހުގެ ރަސޫލާ ﷺ ގެންނެވި ދީނަކީވެސް އެއީއެވެ. މާތް ﷲ ވަޙީކުރައްވާފައިވާ ފަދައިންނެވެ. ﴿ثُمَّ أَوْحَيْنَآ إِلَيْكَ أَنِ ٱتَّبِعْ مِلَّةَ إِبْرَٰهِيمَ حَنِيفًا ۖ وَمَا كَانَ مِنَ ٱلْمُشْرِكِينَ﴾ (ދެން ތިމަންރަސްކަލާނގެ، ކަލޭގެފާނަށް ވަޙީކުރެއްވީމެވެ. ބާޠިލުމަގުން އެއްކިބާވެ، ސީދާމަގުގައިވާ އިބްރާހީމްގެފާނުގެ ދީނަށް، ކަލޭގެފާނު ތަބަޢަވެވަޑައިގަންނަވާށެވެ! ފަހެ، މުޝްރިކުންގެ ތެރެއިން އެކަލޭގެފާނު ނުވެތެވެ.) މިތަނުގައި ނުސީދާކޮށް އަންގަވާފައި އެވަނީ އެބައިމީހުންނީ މުޝްރިކުން ކަމާއި، އެބައިމީހުން މާތް ﷲއަށް އަޅުކަންނުކުރާ ކަމުގައެވެ. އަދި އެބައިމީހުން އަޅުކަން ކުރަނީ އެބައިމީހުންގެ ވެރިންކަމުގައިވާ އަޙްބާރުންނާއި ރާހިބުން އެބައިމީހުންނަށް ޒީނަތްތެރިކޮށް ދެއްކި ތަކެއްޗަށް ކަމުގައެވެ. ﴿ٱتَّخَذُوٓا۟ أَحْبَارَهُمْ وَرُهْبَـٰنَهُمْ أَرْبَابًا مِّن دُونِ ٱللَّـهِ وَٱلْمَسِيحَ ٱبْنَ مَرْيَمَ وَمَآ أُمِرُوٓا۟ إِلَّا لِيَعْبُدُوٓا۟ إِلَـٰهًا وَٰحِدًا﴾ (އެއުރެންގެ ޢިލްމުވެރިންނާއި، ފާދިރީންނާއި، މަރްޔަމްގެފާނުގެ ދަރިކަލުން އަލްމަސީޙު (ޢީސާގެފާނު) އަކީ، اللَّه ފިޔަވައި އިލާހުން ކަމުގައި އެއުރެން ހެދޫއެވެ. (ނަމަވެސް) އެއްކައުވަންތަ އިލާހަށް، އަޅުކަން ކުޅައުމަށް މެނުވީ އެއުރެންނަށް އަމުރުކުރައްވާފައި ނުވެތެވެ.) ދެން އެކަލާނގެ ވަޙީކުރައްވަނީ ﴿وَيُقِيمُوا۟ ٱلصَّلَوٰةَ وَيُؤْتُوا۟ ٱلزَّكَوٰةَ ۚ وَذَٰلِكَ دِينُ ٱلْقَيِّمَةِ﴾ އެބައިމީހުންގެ ފޮތްތަކުގައި އެބައިމީހުންނަށް އަމުރުކުރައްވާފައި ވަނީ ނަމާދު އަދާކުރުމަށާއި، ޒަކާތް އޭގެ ޙައްޤުވެރިންނަށް ހިތުން ރުހުމުން އަދާކުރުމަށެވެ. ސީދާވެގެންވާ ޙައްޤު ދީނަކީ އެއީއެވެ. އެބައިމީހުން އެދީނެއްގައި ތިބި، ގުދުވެފައިވާ ބާޠިލު، ބާވައިލެއްވި ރިސާލާތްތަކާ ޚިލާފު ދީނެއް ނޫނެވެ.

ހަމަކަށަވަރުން، ފޮތުގެ أهل ވެރިންނާއި، مشرك ންގެ ތެރެއިން كافر ވިމީހުންވަނީ ނަރަކައިގެ އަލިފާނުގެ ތެރޭގައެވެ. އެތާނގައި އެއުރެން ދެމިތިބެނިވިގޮތުގައެވެ. އެއުރެންނީ، މީސްތަކުންކުރެ ހަމަ އެންމެ ނުބައިމީހުންނެވެ. (6)

އެފަދައިން ޔަހޫދީން ޢުޒައިރު عليه السلام އަށް އަޅުކަންކުރިއެވެ. އަދި ޢީސާ عليه السلام އާއި މުޙައްމަދު ﷺ ގެ ރަސޫލުކަން ޤަބޫލުކުރަން ދެކޮޅުހެދިއެވެ. ފަހެ، އެބައިމީހުންނީވެސް ކާފިރު ފާފަވެރިންނެވެ. އެހެންކަމުން އެކަލާނގެ ވަޙީކުރައްވަނީ ﴿أُو۟لَـٰٓئِكَ هُمْ شَرُّ ٱلْبَرِيَّةِ﴾ އެންމެހާ ޚަލްޤުތަކުންގެ ތެރެއިން އެންމެ ނުބައިކަން ބޮޑު މީހުންނެވެ. ގެރި ބަކަރި ޖަމަލާއި ވަލު ޖަނަވާރަށްވުރެވެސް މެއެވެ. ތިމާމެންނީ ޢިލްމުގެ އަހުލުވެރިން ކަމުގައި ދަޢުވާކޮށް، ޔަހޫދީންނާއި ނަޞާރާއިންނަކީ ބާވައިލެއްވި ދީނެއްގައި ހިފައިގެން ތިބި ބަޔަކަށް ނުވާނޭ ކަމަށާއި، މުއުމިނުން ފަދައިން އެބައިމީހުންވެސް ސުވަރުގެއަށް ވަންނާނެއޭ ބުނާ މީހުންނާ މެދު ޢަޖާއިބުވާން ޖެހެއެވެ. މާތް ﷲ އެބައިމީހުންނާ މެދު ވަޙީކުރައްވާފައި ވަނީ ﴿أُو۟لَـٰٓئِكَ هُمْ شَرُّ ٱلْبَرِيَّةِ﴾ އެވެ. އެކަލާނގެ އެބައިމީހުން އަބަދުގެ އަބަދަށް ނަރަކައިގައި ތިބޭނޭކަމަށް ނިންމަވައި، އެބައިމީހުން އެންމެހާ ޚަލްޤުތަކުންގެ ތެރެއިން އެންމެ ނުބައިކަން ބޮޑު މީހުން ކަމުގައި ލައްވާފައި ވާއިރު، އެބައިމީހުން ސުވަރުގެއަށް ވަންނާނީ ކިހިނަކުން ހެއްޔެވެ؟ އަދި އެބައިމީހުން އެންމެ ފަހުގެ ނަބިއްޔާ ﷺ ގެ ރަސޫލުކަން ދޮގުކުރާއިރު އެބައިމީހުން ސުވަރުގެއަށް ވަންނާނީ ކިހިނަކުން ހެއްޔެވެ؟ އެކަލޭގެފާނުގެ ރަސޫލުކަމަށް އިންކާރުކުރުމަކީ މާތް ﷲ ދޮގުކުރުމެވެ. އެކަލާނގެ ވަޙީކުރައްވަނީ ﴿مُحَمَّدٌ رَّسُولُ اللهِ﴾ އެވެ. عَنْ أَبِي هُرَيْرَةَ، عَنْ رَسُولِ اللَّهِ صلى الله عليه وسلم أَنَّهُ قَالَ ‏ "‏وَالَّذِي نَفْسُ مُحَمَّدٍ بِيَدِهِ لاَ يَسْمَعُ بِي أَحَدٌ مِنْ هَذِهِ الأُمَّةِ يَهُودِيٌّ وَلاَ نَصْرَانِيٌّ ثُمَّ يَمُوتُ وَلَمْ يُؤْمِنْ بِالَّذِي أُرْسِلْتُ بِهِ إِلاَّ كَانَ مِنْ أَصْحَابِ النَّارِ‏"‏‏. (صحيح مسلم، كتاب الإيمان، باب وُجُوبِ الإِيمَانِ بِرِسَالَةِ نَبِيِّنَا مُحَمَّدٍ صَلَّى اللَّهُ عَلَيْهِ وَسَلَّمَ إِلَى جَمِيعِ النَّاسِ وَنَسْخِ الْمِلَلِ بِمِلَّتِهِ) (އަބޫހުރައިރާ رضي الله عنه ގެ އަރިހުން ރިވާވެގެން ވއެވެ. ރަސޫލުﷲ ﷺ ޙަދީޘުކުރެއްވިއެވެ. ތިމަންކަލޭގެފާނުގެ ފުރާނަ އެކަލާނގެ ބާރުވެރިކަމުގެ ދަށުގައިވާ ރަސްކަލާނގެ ގަންދެއްވަމެވެ. އެ ޔަހޫދީންނާއި ނަޞާރާއިންގެ ތެރެއިން ތިމަންކަލޭގެފާނާ ބެހޭގޮތުން އަޑުއަހައި ތިމަންކަލޭގެފާނު ގެންނެވި ރަސޫލުކަމަށް އީމާންނުވި ކޮންމެ މީހަކު ވާނީ ނަރަކަވެރިންގެ ތެރެއިންނެވެ.) (ޞަޙީޙު މުސްލިމް، ޙަދީޘު: 153) މާތް ﷲ އެބައިމީހުންގެ މައްޗަށް ކާފިރުކަމުގެ ޙުކުމް އިއްވާފައިވާއިރު، އެ ބުއްދިވެރިން ޙުކުމްކުރަނީ އެބައިމީހުންނީ މުއުމިނުން ކަމަށެވެ. އަހަރުމެން ހިފަންވީ ކޮން ބަހެއްގައިތޯއެވެ؟

ހަމަކަށަވަރުން، إيمان ވެ صالح عمل ތައް ކުޅަމީހުން (ދަންނާށެވެ!) އެއުރެންނީ، މީސްތަކުންކުރެ ހަމަ އެންމެ ހެޔޮމީހުންނެވެ. (7)

އީމާންކަމާއެކު ހެޔޮ ޢަމަލުކުޅަ ތެދުވެރި މުއުމިނުންނަކީ އެންމެހާ ޚަލްޤުތަކުންގެ ތެރެއިން އެންމެ ހެޔޮ މީހުންނެވެ. އެބައިމީހުންނީ ދާއިމީ ނިޢުމަތާއި، އެންމެ އުފާވެރި ގޮވަތި ކާމިޔާބުކުރި ހެޔޮލަފާ ބާއްޖަވެރިންނެވެ.

އެއުރެންގެ ވެރިރަސްކަލާނގެ حضرة ގައި، އެއުރެންގެ ޖަޒާއަކީ، އެތާނގެ ދަށުން ކޯރުތައް ހިނގަހިނގާ ހުންނަ عدن އެވެ ކިއުނު ސުވަރުގެތަކެވެ. އެތާނގައި އެއުރެން އަބަދަށް ދެމިތިބެނިވިގޮތުގައެވެ. اللَّه އެއުރެންނަށް ރުހިވޮޑިގެންވެތެވެ. އަދި އެއުރެން އެކަލާނގެ (ދެއްވި نعمة) އަށް ރުހިގެންވެތެވެ. އެ نعمة ލިބޭހުށީ، އެމީހާގެ ވެރިރަސްކަލާނގެއަށް ބިރުވެތިވި މީހަކަށެވެ. (8)

އެބައިމީހުން ދުނިޔޭގައި އިސްކުޅަ ކިޔަމަންތެރިކަމާއި، ހެޔޮ ޢަމަލުގެ ބަދަލުގައި އެބައިމީހުންނަށް އާޚިރަތުގައި ލިބޭނޭ ދަރުމައަކީ އެތަންތަނުގެ ގަނޑުވަރުތަކުގެ ދަށުން ސުވަރުގޭގެ ކޯރުތައް ހިނގާ ފެހިކަން ގަދަ ބަގީޗާތަކެވެ. ﴿خَـٰلِدِينَ فِيهَآ أَبَدًا﴾ އެބައިމީހުން ދުވަހަކުވެސް އެތަނުން ނުކުތުމެއް އަދި މަރުވުމެއް ނުވެއެވެ. ފަހެ، އެބައިމީހުން އެންމެ ރަނގަޅު ޙާލުގައި، އެންމެ ރަނގަޅު ތަނުއި، މެދުކެނޑުމެއް ނެތް ދާއިމީ ނިޢުމަތުގައި އަބަދަށް ދެމިތިބޭނެއެވެ. ﴿رَّضِىَ ٱللَّـهُ عَنْهُمْ وَرَضُوا۟ عَنْهُ ۚ ذَٰلِكَ لِمَنْ خَشِىَ رَبَّهُۥ﴾ އެބައިމީހުން މާތް ﷲގެ ރުހިވޮޑިގަތުން ލިބިގެންފިއެވެ. އަދި މާތް ﷲ އެބައިމީހުންނަށް ދެއްވި ދަރުމައާއި، މާތްކަމާއި، ތަޞައްވަރުނުކުރެވޭހާ މަތިވެރި މާތް ދެއްވުންތަކާމެދު އެބައިމީހުން ވަނީ ރުހިގެންނެވެ. މި ހެޔޮ ޖަޒާއާއި ދަރުމަ ދެއްވަނީ މާތް ﷲއަށް ބިރުވެތިވެ، އެކަލާނގެއަށް ތަޤްވާވެރިވެ، އެކަލާނގެ ޙަރާމްކުރައްވާފައިވާ ކަންތަކުން ދުރުވެގަތް މީހަކަށެވެ.