ތަފްސީރު
މި ސޫރަތުގައި މާތް ﷲ ވަނީ ތިން ހުވައެއް ވަޙީކުރައްވާފައެވެ. އިސް ރަސޫލު ބޭކަލުން ކަމުގައިވާ މޫސާ عليه السلام އާއި، ޢީސާ عليه السلام އާއި މުޙައްމަދު ﷺ އެތަންތަނުން ވަޑައިގެންނެވި މާތް ބިންތައް ގަންދެއްވައެވެ. އެއީ، އެތަންތަނުން ނަބީކަމުގެ ނޫރު ވިދާލި، އެތަންތަނުގައި ނަބީބޭކަލުންނާއި، ރަސޫލުބޭކަލުންގެ މައްޗަށް އިލާހީ ވަޙީ ބާވައިލެއްވި ތަންތަނެވެ. ފުރަތަމަ ހުވައި ވަޙީކުރެއްވީ ވައްތީންޏާއި، ޒައިތޫނި ގަންދެއްވައެވެ. އެ ދެގަސް ހެދެނީ ފަލަސްޠީނުގެ ބިމުގައެވެ. އެއީ ބަނީއިސްރާއީލުގެ އެންމެ ފަހުގެ ނަބިއްޔާ ޢީސާ عليه السلام ދުނިޔޭގެ އަލިކަން ދެކެވަޑައިގަތް ބިމެވެ. ދެވަނަ ހުވައި ވަޙީކުރެއްވީ ޠޫރު ފަރުބަދަ ގަންދެއްވައެވެ. އެއީ، އެތަނުގައި މާތް ﷲ މޫސާ عليه السلام އަށް ބަސްވަޙީކުރައްވައި، އެކަލޭގެފާނަށް ނިދާ އިއްވަވައި، އެކަލޭގެފާނު ޚިޔާރުކުރައްވައި، އެކަލޭގެފާނު ބަނީއިސްރާއީލު މީހުންގެ ގާތަށް ރަސޫލުކަމާއިގެން ފޮނުއްވި ތަނެވެ. ތިންވަނަ ހުވައި ވަޙީކުރެއްވީ މާތްވެގެންވާ މައްކާ ގަންދެއްވައެވެ. އެއީ، ރަސޫލުބޭކަލުންގެ ސާހިބާ، އަދި ކާއިނާތުގެ ފަޚުރުކަމުގައިވާ މުޙައްމަދު ﷺ ދުނިޔޭގެ އަލިކަން ދެކެވަޑައިގަތް ރަށެވެ. ޢިކްރިމާ ވިދާޅުވިއެވެ. މާތް ﷲ ހުވައިވަޙީކުރެއްވީ ވައްތީންޏާއި ޒައިތޫނި ފަޅައިގެން ހެދޭ ތަންތަން ގަންދެއްވައެވެ. ފަހެ، އެދެގަސް އެންމެ ގިނައިން ހެދެނީ ފަލަސްޠީނާއި ޝާމުކަރައިގައެވެ. ﴿وَطُورِ سِينِينَ﴾ އެއީ ޠޫރު ފަރުބަދައެވެ. ﴿وَهَـٰذَا ٱلْبَلَدِ ٱلْأَمِينِ﴾ އެއީ މާތްވެގެންވާ މައްކާ އެވެ. މިގޮތަށް ބުރަވެވަޑައިގަތީ އައްޠަބަރީ އާއި އިބްނުކަޘީރެވެ. އޭނާ ވިދާޅުވެފައި ވެއެވެ. މިއީ ތިންތަނެކެވެ. އެއިން ކޮންމެ ތަނަކަށް ބޮޑު ޝަރީޢަތާއިގެން ވަޑައިގެންނެވި، އަދި އުލުލްޢަޒްމިގެ ތެރޭގައި ހިމެނިވަޑައިގަންނަވާ ރަސޫލުބޭކަލަކު ފޮނުއްވިއެވެ. ފުރަތަމަ ތަނަކީ ބައިތުލްމަޤްދިސެވެ. އެއީ ވައްތީންޏާއި ޒައިތޫނި ހެދޭތަނެވެ. މާތް ﷲ ޢީސާ عليه السلام ރަސޫލުކަމާއިގެން ފޮނުއްވީ އެބިމުންނެވެ. ދެވަނަ ތަނަކީ ޠޫރު ފަރުބަދައެވެ. އެއީ، އެތަނެއްގައި މާތް ﷲ މޫސާ عليه السلام އަށް ބަސްވަޙީކުރެއްވި ބިމެވެ. ތިންވަނަ ތަނަކީ އަމާންކަން ލިބިގެންވާ ރަށްކަމުގައިވާ މައްކާއެވެ. އެއީ އެތަނަކަށް މާތް ﷲ ރަސޫލުކަމާއިގެން މުޙައްމަދު ﷺ ފޮނުއްވި ތަނެވެ.... އަހުރެން ބުނަމެވެ. މިއީ އެންމެ ޞައްޙަކަން ބޮޑު، އެންމެ ފާޅުކަންބޮޑު ގޮތެވެ. އެތަންތަނުގެ މެދުގައި ގުޅުން އޮތުމުންނެވެ. އެހެނީ މާތް ﷲ ވަނީ ޠޫރު ފަރުބަދައާއި، މައްކާގެ މައްޗަށް ވައްތީންޏާއި ޒައިތޫނި ޢަޠުފުކުރައްވާފައެވެ. އޭރުން އެ ހުވައި ވާނީ މާތް ﷲ ވަޙީ ބާވައިލެއްވުމުންނާއި، އެންމެ މަތިވެރި ރަސޫލުބޭކަލުން އެތަންތަނުން ރަސޫލުކަމާއިގެން ފޮނުއްވުން ޝަރަފުކުރެއްވި ބިންތައް ގަންދެއްވައި ވަޙީކުރެއްވި ހުވަޔަކަށެވެ. ނޫންނަމަ ޠޫރު ފަރުބަދައާއި، މައްކާއި ވަންތީންޏާއި ޒައިތޫނީގެ އޮތީ ކޮން ގުޅުމެއް ހެއްޔެވެ؟ އިބްނު ޢައްބާސް رضي الله عنه ގެ އަރިހުން ވާރިދުވެފައިވާ ރިވާޔަތެއްގައި ވެއެވެ. "އެއީ އަހަރުމެން ކައިއުޅޭ ވައްތީންޏާއި، އަހަރުމެން އެއިން ދިޔަ ފެލާ ޒައިތޫންޏެވެ." ދެ ބަހުގެ ދެމެދުގައި އަރައިރުމެއް ނެތެވެ. އެތަކެތި ހެދޭ ތަނަށް އިޝާރާތްކުރެއްވުމާއެކު، އެއިން ލިބޭ މަންފާ ގިނަކަމާއި، އެއަށް ލިބިގެންވާ ޚާއްޞަ ކަންތައް ގިނަކަން ބަޔާން ކުރެއްވުން ވެސް އޭގެ މާނައިގައި ހިމެނިދާނެތީއެވެ. އެހެންކަމުން އެކަލޭގެފާނު ވިދާޅުވެފައި ވެއެވެ. "އެ ތަންތަނާއި ތަކެތި ގަންދެއްވައި ހުވައި ވަޙީކުރެއްވުމުގެ ބޭނުމަކީ، ނަބީބޭކަލުން އެތަންތަނުން ފޮނުއްވުންފަދަ ހެވާއި ބަރަކާތް އެކުލެވޭ ކަންކަމުގެ ސަބަބުން އެތަންތަނަށް ލިބިފައިވާ ޝަރަފު ބަޔާންކުރެއްވުމެވެ." ހުވައިގެ ޖަވާބަކީ މާތް ﷲގެ މިވަޙީބަސްފުޅެވެ.