އަދި ރޭގަނޑު އަނދިރިކަން ފެތުރި، ހިމޭންވާހިނދު، އެ ރޭގަނޑު ގަންދެއްވަމެވެ. (2)

ރޭގަނޑުގެ އަދިރިކަން ގަދަވެ އަޑުތައް ހަމަހިމޭންވެ، ހަރަކާތްތައް ހުއްޓުމަކަށް އައިސް، މީސްތަކުން ނިދައި އަރާމުކުރުމަށް ދާހިނދު، އެ ރޭގަނޑު ގަންދެއްވަމެވެ.

ކަލޭގެފާނު ވެރިރަސްކަލާނގެ، ކަލޭގެފާނު ދޫކޮށެއް ނުލައްވަތެވެ. އަދި ނުރުހުންވެވޮޑިއެއް ނުގަންނަވަތެވެ. (3)

وَدَّعَ ގެ މާނައަކީ ދޫކޮށްލައިފިއެވެ. قَلَىٰ ގެ މާނައަކީ ނުރުހުންވެއްޖެއެވެ. މާނައީ: މުޙައްމަދު ﷺ އެވެ! މާތް ﷲ ކަލޭގެފާނު ނަބީކަމަށް އިޚްތިޔާރުކުރެއްވި ދުވަހުއްސުރެ އެކަލާނގެ ކަލޭގެފާނު ދޫކޮށެއްނުލައްވައެވެ. އަދި ކަލޭގެފާނަށް ނުރުހުންވެވޮޑިއެއްނުގަންނަވައެވެ. ފަހެ، ކަލޭގެފާނަކީ އެކަލާނގެ ޙަޟްރަތަށް ކުއްތަންކުރައްވާފައިވާ، އެކަލާނގެއަށް ލޮބުވެތި ޙަބީބެވެ. މިއީ، މުޙައްމަދު ﷺ ގެ ވެރިރަސްކަލާނގެ އެކަލޭގެފާނު ދޫކުރައްވައި، އެކަލޭފާނަށް ނުރުހުންވެވޮޑިގެންފިއޭ ބުނެ މުޝްރިކުން ދެއްކި ވާހަކަ ހަމަނުޖެހޭ ކަން ބަޔާންކުރައްވައި، އެބައިމީހުންނަށް ދެއްވާފައިވާ ރައްދެކެވެ. މިތަނުގައި މާތް ﷲ އެބައިމީހުންގެ އެ ބުހުތާން ދޮގަށް ރައްދުދެއްވީއެވެ. މިއާޔަތްތައް ބުނާފަދައެވެ. ކަލޭގެފާނަށް ރަސޫލުކަމުގެ ނިޢުމަތް ދެއްވި ރަސްކަލާނގެ، ކަލޭގެފާނު ހަނދުމަނެތިކުރައްވައި، ކަލޭގެފާނު ދޫކޮށްނުލައްވާނެއެވެ. އަދި ކަލޭގެފާނަށް ނުރުހުންވެވޮޑިނުގަންނަވާނެއެވެ. އެކަލޭގެފާނުގެ ވެރިރަސްކަލާނގެ ހުވައިވަޙީކުރައްވައި، އެކަލާގެފާނަކީ އެކަލޭގެފާނުގެ ވެރިރަސްކަލާނގެ ޙަޟްރަތުގައި ޤަދަރުއުފުލިގެންވާ، މަތިވެރި މަޤާމެއްގެވެރި، އެކަލާނގެ ޙަޟްރަތަށް ކުއްތަންކުރައްވާފައިވާ ޙަބީބުކަން އެންގެވުމަކީ އެކަލޭގެފާނަށް ދެއްވާފައިވާ އުފާވެރިކަމުގެ މަތިވެރި ޚަބަރެކެވެ. ރަސޫލުކަމުގެ މަސްއޫލިއްޔަތު އުފުއްލެވުމަށް ކަލޭގެފާނު އިޚްތިޔާރު ކުރެއްވީ އެކަލާނގެ ކަމުގައި ވާއިރު، އެކަލާނގެ ކަލޭގެފާނަށް ނުރުހުންވެ ވޮޑިގެން ކަލޭގެފާނު ދޫކުރައްވާނީ ކިހިނަކުން ހެއްޔެވެ؟

އަދި ކަލޭގެފާނަށްޓަކައި، ދުނިޔެއަށްވުރެ، آخرة ހެޔޮކަން ބޮޑުކަން ކަށަވަރެވެ. (4)

ކަލޭގެފާނަށް މިފަނާވަނިވި ދުނިޔެއަށްވުރެ އާޚިރަތް ހެޔޮކަން ބޮޑުވެގެން ވެއެވެ. އެހެންކަމުން އެކަލޭގެފާނު ވިދާޅުވާކަމުގައި ވިއެވެ."اللهُمَّ لاَ عَيشَ إلاَّ عَيُشُ الآخِرَة" (صحيح مسلم، كتاب الجهاد والسير، باب غَزْوَةِ الأَحْزَابِ وَهِيَ الْخَنْدَقُ) (އަޅުގެ ވެރިރަސްކަލާކޮ! އާޚިރަތުގެ ދިރިއުޅުން މެނުވީ ދިރިއުޅުމެއް ކަމުގައި ނުވެއެވެ.) (ޞަޙީޙު މުސްލިމް، ޙަދީޘު: 1805)

އަދި ނިކަންހުރެ، ކަލޭގެފާނުގެ ވެރިރަސްކަލާނގެ، ކަލޭގެފާނަށް ދެއްވާނެކަން ކަށަވަރެވެ. ދެން ކަލޭގެފާނު ރުހިވަޑައިގަންނަވާނެތެވެ. (5)

ދަރުމައާއި، މާތްކަމާއި، ޝަފާޢަތުގެ ތެރެއިން ކަލޭގެފާނު ރުހިވަޑައިގަންނަވާ ވަރަށް ކަލޭގެފާނުގެ ވެރިރަސްކަލާނގެ ދެއްވާނެއެވެ. އިބްނު ޢައްބާސް رضي الله عنهما ވިދާޅުވިއެވެ. "އެއީ އެކަލޭގެފާނު ރުހިވަޑައިގަންނަވާ ވަރު ވަންދެން އެކަލޭގެފާނުގެ އުއްމަތަށް ޝަފާޢަތްތެރިވެވަޑައިގަތުމެވެ." އެކަލޭގެފާނުގެ މިބަސްފުޅަށް މުސްލިމްގެ މިރިވާޔަތުން ތާއީދު ލިބެއެވެ. عَنْ عَبْدِ اللَّهِ بْنِ عَمْرِو بْنِ الْعَاصِ، أَنَّ النَّبِيَّ صلى الله عليه وسلم تَلاَ قَوْلَ اللَّهِ عَزَّ وَجَلَّ فِي إِبْرَاهِيمَ ﴿رَبِّ إِنَّهُنَّ أَضْلَلْنَ كَثِيرًا مِّنَ ٱلنَّاسِ ۖ فَمَن تَبِعَنِى فَإِنَّهُۥ مِنِّى ۖ وَمَنْ عَصَانِى فَإِنَّكَ غَفُورٌ رَّحِيمٌ﴾ الآيَةَ ‏.‏ وَقَالَ عِيسَى عَلَيْهِ السَّلاَمُ ﴿إِن تُعَذِّبْهُمْ فَإِنَّهُمْ عِبَادُكَ ۖ وَإِن تَغْفِرْ لَهُمْ فَإِنَّكَ أَنتَ ٱلْعَزِيزُ ٱلْحَكِيمُ﴾ فَرَفَعَ يَدَيْهِ وَقَالَ ‏"‏ اللَّهُمَّ أُمَّتِي أُمَّتِي ‏"‏ ‏.‏ وَبَكَى فَقَالَ اللَّهُ عَزَّ وَجَلَّ يَا جِبْرِيلُ اذْهَبْ إِلَى مُحَمَّدٍ وَرَبُّكَ أَعْلَمُ فَسَلْهُ مَا يُبْكِيكَ فَأَتَاهُ جِبْرِيلُ - عَلَيْهِ الصَّلاَةُ وَالسَّلاَمُ - فَسَأَلَهُ فَأَخْبَرَهُ رَسُولُ اللَّهِ صلى الله عليه وسلم بِمَا قَالَ ‏.‏ وَهُوَ أَعْلَمُ ‏.‏ فَقَالَ اللَّهُ يَا جِبْرِيلُ اذْهَبْ إِلَى مُحَمَّدٍ فَقُلْ إِنَّا سَنُرْضِيكَ فِي أُمَّتِكَ وَلاَ نَسُوءُكَ‏.‏ (صحيح مسلم، كتاب الإيمان، باب دُعَاءِ النَّبِيِّ صلى الله عليه وسلم لأُمَّتِهِ وَبُكَائِهِ شَفَقَةً عَلَيْهِمْ) (ޢަބްދުﷲ ބިން ޢަމްރު ބިން އަލްޢާޞް رضي الله عنه ގެ އަރިހުން ރިވާވެގެން ވެއެވެ. މާތް ﷲ ވަޙީކުރައްވާފައިވާ އިބްރާހީމް عليه السلام ގެ މިބަސްފުޅު ﴿رَبِّ إِنَّهُنَّ أَضْلَلْنَ كَثِيرًا مِّنَ ٱلنَّاسِ ۖ فَمَن تَبِعَنِى فَإِنَّهُۥ مِنِّى ۖ وَمَنْ عَصَانِى فَإِنَّكَ غَفُورٌ رَّحِيمٌ﴾ އާއި ޢީސާ عليه السلام ގެ މިބަސްފުޅު ﴿إِن تُعَذِّبْهُمْ فَإِنَّهُمْ عِبَادُكَ ۖ وَإِن تَغْفِرْ لَهُمْ فَإِنَّكَ أَنتَ ٱلْعَزِيزُ ٱلْحَكِيمُ﴾ ކިޔަވަައިވިދާޅުވެފައި ނަބިއްޔާ ﷺ އެކަލޭގެފާނުގެ ދެއަތްޕުޅު މައްޗަށް އުފުއްލެވިއެވެ. އަދި ”އަޅުގެ ވެރިރަސްކަލާކޮ! އަޅުގެ އުއްމަތް، އަޅުގެ އުއްމަތް...“ ވިދާޅުވެ ކީރިތިކުރެއްވިއެވެ. ދެން މާތް ﷲ ޖިބްރީލު عليه السلام އަށް ވަޙީކުރެއްވިއެވެ. މުޙައްމަދު ﷺގެ އަރިހަށް ވަޑައިގަންނަވާށެވެ. (ކަލޭގެފާނުގެ ވެރިރަސްކަލާނގެ މޮޅަށް ދެނެވޮޑިގެން ވެއެވެ.) އަދި އެކަލޭފާނުގެ އަރިހުން އައްސަވާށެވެ. ކަލޭގެފާނު ކީރިތިކުރައްވަނީ ކޮންކަމާތޯއެވެ. ދެން ޖިބްރީލު عليه السلام ރަސޫލުﷲ ﷺ އާ ސުވާލުކުރެއްވުމުން އެކަލޭގެފާނު ވިދާޅުވި ބަސްފުޅުތައް އެކަލޭގެފާނު ޖިބްރީލު عليه السلام އަށް ވިދާޅުވެދެއްވިއެވެ. (މާތް ﷲ އެބަސްފުޅުތައް މޮޅަށް ދެނެވޮޑިގެން ވެއެވެ.) ދެން މާތް ﷲ ވަޙީކުރެއްވިއެވެ. ޖިބްރީލު عليه السلام އެވެ. މުޙައްމަދު ﷺ ގެ އަރިހަށް ވަޑައިގެން ވިދާޅުވާށެވެ. ހަމަކަށަވަރުން ކަލޭގެފާނުގެ އުއްމަތުގެ މައްސަލައިގައި ކަލޭގެފާނު ރުހިވަޑައިގަންނަވާ ގޮތަށް ތިމަންރަސްކަލާނގެ ހައްދަވާހުށީމެވެ. ކަލޭގެފާނަށް ދެރަ ގޮތެއް ނުހައްދަވާހުށީމެވެ.) (ޞަޙީޙު މުސްލިމް، ޙަދީޘު: 202) މިއީ ހަމަކަށަވަރުން އެ މަތިވެރި ރަސޫލާ ﷺ އަށް ލިބިވަޑައިގެންނެވި އުފާވެރިކަމުގެ ޚަބަރެކެވެ. އެކަލޭގެފާނު ރުހިވަޑައިގަންނަވަންދެން މާތް ﷲ އެކަލޭގެފާނަށް ދެއްވުމަކީ އެކަލޭގެފާނުގެ މޭފުޅަށް ފިނިކަން ލިއްބައިދީ، އެކަލޭގެފާނުގެ ޤަދަރު އުފުލައިދޭނޭ ކަމެކެވެ. ފަހެ ދުނިޔޭގައި މާތް ﷲ އެކަލޭގެފާނަށް ނަޞްރުދެއްވައި، ޢަދުއްވުންގެ މައްޗަށް ކާމިޔާބުދެއްވިއެވެ. އާޚިރަތުގައި މަތިވެރި ޝަފާޢަތާއި، އަލްމަޤާމުލް މަޙްމޫދު ދެއްވިއެވެ. ދެން އެކަލޭގެފާނު ތުއްޕުޅު ޔަތީމެއްގެ ގޮތުގައި ހުންނެވި އިރުން ފެށިގެން ބޮޑުފުޅުވެގެންވާ އެކަލޭގެފާނާ އަމާނާތް ޙަވާލުކުރައްވަންދެން އެކަލޭގެފާނަށް މާތް ﷲ ދެއްވާފައިވާ ފަޟްލުވަންތަކަމާއި، ނިޢުމަތްތައް ހަނދުމަކޮށްދެއްވަމުން އެކަލާނގެ ވަޙީކުރައްވަނީ

ކަލޭގެފާނު يتيم އަކު ކަމުގައިވަނިކޮށް އެކަލާނގެ ކަލޭގެފާނު ދެކެވޮޑިގެން ނުވޭހެއްޔެވެ؟ ދެން އެކަލާނގެ، ކަލޭގެފާނަށް ހިޔާވަހިކަން ދެއްވިއެވެ. (6)

މުޙައްމަދު ﷺ އެވެ. ކަލޭގެފާނު ޔަތީމަކު ކަމުގައި ނުވަމުހެއްޔެވެ؟ ދެން މާތް ﷲ ކަލޭގެފާނަށް ހިޔާވަހިކަން ދެއްވައި، ކަލޭގެފާނުގެ ކާފާފުޅު އަރިހުގައި ބެހެއްޓެވިއެވެ. ދެން ކަލޭގެފާނުގެ ބޮޑުބޭބޭފުޅު އަބޫ ޠާލިބުގެ އަރިހުގައި ބެހެއްޓެވިއެވެ. އަދި ކަލޭގެފާނުގެ ރަސޫލުކަމަށް އީމާންނުވާ މީހުންގެ ބެލެހެއްޓުންތެރިކަމުގައި ކަލޭގެފާނުގެ ލައްވާވަރަށް ހިތްތަކުގައި ކަލޭގެފާނަށްޓަކައި އޯގާތެރިކަން ލެއްވިއެވެ.

އަދި ކަލޭގެފާނު حيران ވެވަޑައިގެންވަނިކޮށް، އެކަލާނގެ ކަލޭގެފާނު ދެކެވޮޑިގަތެވެ. ދެން އެކަލާނގެ ކަލޭގެފާނަށް މަގުދެއްކެވިއެވެ. (7)

އަދި ޝަރީޢަތާއި ދީން ދެނެވަޑައިގަންނަވާނެ މަގު އެނގިވަޑައިނުގެން ކަލޭގެފާނު ހުންނަވަނިކޮށް އެކަލާނގެ ކަލޭގެފާނަށް އެކަމަށް މަގުދެއްކެވިއެވެ. އަދި ކަލޭގެފާނަށް އެނގިވަޑައިގެންފައި ނެތް ކަންކަން ކަލޭގެފާނަށް އުނގަންނަވައިދެއްވިއެވެ. އައްޟައްޙާކު ވިދާޅުވިއެވެ. ﴿وَوَجَدَكَ ضَآلًّا﴾ ގެ މާނައަކީ ކަލޭގެފާނު ޤުރްއާން ދެނެވަޑައިގަންނަވާ ކަމުގައި ނުވެއެވެ. އަދި ކަލޭގެފާނަށް ޝަރީޢަތްތައް އެނގިވަޑައިގެންފައި ނެތެވެ. ދެން، މާތް ﷲ އެކަންކަމަށް ކަލޭގެފާނަށް މަގުދެއްކެވިއެވެ. މިއާޔަތުގެ މާނައިގައި ރަނގަޅު ގޮތަކީ މިއީއެވެ. މިތަނުގައި الضلال ގެ މާނައަކީ މާތް ﷲ ފިޔަވައި އެހެން ފަރާތަކަށް އަޅުކަންކުރުމެއް ނޫނެވެ. ނުވަތަ މުންކަރާތްތަކަށާއި ފާފަތަކަށް އަރައިގަތުމެއް ނޫނެވެ. އެހެނީ، އެކަލޭގެފާނުގެ ތުއްޕުޅު އިރުއްސުރެ ރަސޫލުﷲ ﷺ ހުންނެވީ ފިޠުރަތުގެ ސީދާ ގޮތްމަތީގައެވެ. އެކަލޭގެފާނު ރާ ނުހިއްޕަވައެވެ. ބުދަކަށް އަޅުކަން ނުކުރައްވައެވެ. އަދި އެކަލޭގެފާނުގެ ޤައުމުގެ ދީން މަތީގައިވެސް އެކަލޭގެފާނު ނުހުންނަވައެވެ. އަދި ކިއެއްތަ އާޔަތުގެ މުރާދަކީ ޝަރީޢަތާއި ދީނުގެ ކަންކަން އެނގިވަޑައިގެންފައި ނެތުމެވެ. މާތް ﷲގެ މި ވަޙީބަސްފުޅުގައި ވާފަދައިންނެވެ. ﴿مَا كُنتَ تَدْرِى مَا ٱلْكِتَـٰبُ وَلَا ٱلْإِيمَـٰنُ﴾ (ފޮތަކީ ކޮންއެއްޗެއްކަން، އަދި އީމާނަކީ ކޮންއެއްޗެއްކަން ކަލޭގެފާނު (ކުރިން) ދެނެވަޑައިގަންނަވާ ކަމުގައި ނުވެތެވެ.)

އަދި فقير އަކު ކަމުގައި ކަލޭގެފާނުވާތީ، އެކަލާނގެ ކަލޭގެފާނު ދެކެވޮޑިގަތެވެ. ދެން އެކަލާނގެ ކަލޭގެފާނު މުއްސަނދިކުރެއްވިއެވެ. (8)

އަދި އެހީތެރިކަމަށް ބޭނުންވެފައިވާ ފަޤީރަކު ކަމުގައި ކަލޭގެފާނުވާތީ ދެކެވޮޑިގެން، އަޅުތަކުން ފިޔަވައި ފުދިގެންވާ މީހަކުކަމުގައި އެކަލާނގެ ކަލޭގެފާނު ހެއްދެވިއެވެ. އަދި ކަލޭގެފާނަށް ރިޒުޤާއި ވިޔަފާރީގެ ވަސީލަތްތައް ތަނަވަސްކޮށްދެއްވިއެވެ. މާތް ﷲގެ އެކަލޭގެފާނަށް ދެއްވި ތިން ނިޢުމަތެއް ބަޔާންކުރެއްވުމަށްފަހު، އެ ތިން ނިޢުމަތާ ގުޅޭ ތިން ވަޞިއްޔަތެއް އެކަލޭގެފާނަށް ކުރެއްވިއެވެ. މާތް ﷲ އެކަލޭގެފާނަށް އިޙްސާންތެރިވެވޮޑިގަތް ފަދައިން އެކަލޭގެފާނު މީސްތަކުންނަށް އިޙްސާންތެރިވެވަޑައިގަތުމަށް ޓަކައެވެ. އެކަލާނގެ ވަޙީކުރައްވަނީ

ދަންނާށެވެ! ފަހެ، ކަލޭގެފާނު، يتيم ކުއްޖާ ނިކަމެތިކޮށް ނުލައްވާށެވެ! (9)

ދަންނާށެވެ! ކަލޭގެފާނު ޔަތީމުކުއްޖާ ނިކަމެތި ނުކުރައްވާށެވެ. އޭނާއާމެދު ހިތްޕުޅާނުވުމުގެ ގޮތް މޫނުފުޅުން ނުދައްކަވާށެވެ. އަދި އޭނާގެ މުދަލުގެ މައްޗަށް ގަދަވެވަޑައިނުގަންނަވާށެވެ. އަދި ކިއެއްތަ އޭނާއަށް އިޙްސާންތެރިވެވަޑައިގެން، އޭނާއަށް އޯގާތެރިވެވަޑައިގަންނަވާށެވެ. ފަހެ، ކަލޭގެފާނު ވަނީ ޔަތީމުކަމުގެ ރަހަދެކެވަޑައިގެންފައެވެ. އެހެންކަމުން ޔަތީމުކުއްޖާއަށް އޯގާތެރި ބަފައެއްކަމުގައި ކަލޭގެފާނު ވެވަޑައިގަންނަވާށެވެ.

އަދި ދަންނާށެވެ! ފަހެ، ކަމަކަށް އެދި އަންނަ މީހާއަށް ކަލޭގެފާނު އަޑުލައި ނަހައްދަވާށެވެ! (10)

އަދި ދަންނާށެވެ! އެހީތެރިކަމާއި އިޙްސާންތެރިކަމަށް އެދިގެން އަންނަ ބޭނުން ޖެހިފައިވާ ފަޤީރު މީހާ އެއްޗަކަށް އެދުމުން އޭނާ ފޮނުއްވައިނުލައްވާށެވެ. އަދި ހަރުކަށި ބަހުން އޭނާއާ މުޚާޠަބުނުކުރައްވާށެވެ. އަދިކިއެއްތަ، މާތް ﷲ ކަލޭގެފާނަށް ދެއްވި އެއްޗަކުން އޭނާއަށް ދެއްވާށެވެ. އަދި އޯގާވެރިކަމާ، މަޑުމައިތިރިކަމާއެކު މިސްކީނު މީހާ ފޮނުއްވަވާށެވެ. މިއީ އެކަލާނގެ ވަޙީބަސްފުޅު ﴿وَوَجَدَكَ عَآئِلًا فَأَغْنَىٰ﴾ އާއި ގުޅުއްވައިގެން ކުރައްވާފައިވާ ވަޞިއްޔަތެވެ. ތިންވަނަ ވަޞިއްޔަތުގައި އެކަލާނގެ ވަޙީކުރައްވަނީ

އަދި ދަންނާށެވެ! ކަލޭގެފާނުގެ ވެރިރަސްކަލާނގެ ދެއްވި نعمة ގެ ވާހަކައިން، ފަހެ، ކަލޭގެފާނު ވާހަކަ ދައްކަވައި އުޅުއްވާށެވެ! (11)

ކަލޭގެފާނުގެ މައްޗަށްވާ މާތް ﷲގެ ފަޟްލުވަންތަކަމާއި، އެކަލާނގެ ކަލޭގެފާނަށް ދެއްވި ނިޢުމަތުގެ ވާހަކަ މީސްތަކުންގެ ގާތުގައި ދައްކަވާށެވެ. އަދި ކަލޭގެފާނަށް އުނގަންނަވައިދެއްވި ފަދައިން މީސްތަކުންނަށް އުނގަންނަވައިދެއްވާށެވެ. މިއީ އެކަލާނގެ ވަޙީބަސްފުޅު ﴿وَوَجَدَكَ ضَآلًّا فَهَدَىٰ﴾ އާއި ގުޅިގެން ކުރެއްވި ވަޞިއްޔަތެވެ. އެބަހީ، މާތް ﷲ ކަލޭގެފާނު މާތްކުރައްވައި، ކަލޭގެފާނަށް އެ ނިޢުމަތްދެއްވި ފަދައިން، ކަލޭގެފާނަކީ ޔަތީމަކު، ފަޤީރަކު އަދި މަގު ނޭނގިފައިވާ މީހަކު ކަމުގައި ވަނިކޮށް، އެކަލާނގެ ކަލޭގެފާނަށް މަގު ދައްކަވައި، ހިޔާވަހިކަން ދެއްވައި، މީސްތަކުން ފިޔަވައި ފުދިގެންވާ މީހަކު ކަމުގައި ކަލޭގެފާނު ލެއްވިފަދައިން، ޔަތީމު ކުއްޖާއަށް ކަލޭގެފާނު އޯގާތެރިވެވަޑައިގަންނަވާށެވެ. އެހީއަށް އެދިގެން އަންނަ މީހާއަށް އިޙްސާންތެރިވެވަޑައިގަންނަވާށެވެ. އަދި މާތް ﷲ ކަލޭގެފާނަށް އެކަލާނގެ ސީދާވެގެންވާ ދީނަށް މަގުދެއްކެވި ފަދައިން، އަޅުތަކުންނަށް ހެޔޮކަމުގެ މަގަށް މަގުދައްކަވާށެވެ.