فَدَلَّىٰهُمَا بِغُرُورٍ ۚ فَلَمَّا ذَاقَا ٱلشَّجَرَةَ بَدَتْ لَهُمَا سَوْءَٰتُهُمَا وَطَفِقَا يَخْصِفَانِ عَلَيْهِمَا مِن وَرَقِ ٱلْجَنَّةِ ۖ وَنَادَىٰهُمَا رَبُّهُمَآ أَلَمْ أَنْهَكُمَا عَن تِلْكُمَا ٱلشَّجَرَةِ وَأَقُل لَّكُمَآ إِنَّ ٱلشَّيْطَـٰنَ لَكُمَا عَدُوٌّ مُّبِينٌ ﴿ ٢٥ ﴾
ތަރުޖަމާ
މަކަރުވެރިކަމުން އެކަލޭގެ އެ ދެކަނބަލުން ހަލާކުގެ ތެރެޔަށް ވައްޓާލިއެވެ. ދެންފަހެ، އެ ދެކަނބަލުން، އެ ގަހުން ރަހަބެއްލެވިހިނދު، އެ ދެކަނބަލުންގެ عورة އެ ދެކަނބަލުންނަށް ފާޅުވެއްޖެއެވެ. އަދި އެ ދެކަނބަލުން ސުވަރުގޭގެ (ގަހުގެ) ފަތްތަކުން (عورة) ނިވާކުރެއްވުމަށް އަވަސްވެވަޑައިގަތެވެ. އަދި އެ ދެކަނބަލުންގެ ވެރިރަސްކަލާނގެ، އެ ދެކަނބަލުންނަށް ނިދާ އިއްވެވިއެވެ. އެގަހާ ކައިރިވެވަޑައިގަތުން ތިމަންރަސްކަލާނގެ ތިޔަ ދެކަނބަލުންނަށް ނަހީ ނުކުރައްވަން ހެއްޔެވެ؟ އަދި ހަމަކަށަވަރުން، شيطان އާއީ، ތިޔަ ދެކަނބަލުންނަށް بيان ވެގެންހުރި عداوة ތެރިއެއް ކަމަށް وحى ނުކުރައްވަން ހެއްޔެވެ؟ (22)
ތަފްސީރު
މަކަރުވެރިކަމުން މާތް ﷲ ގަންދީ ހުވައިކޮށް އެކަލޭގެ އެދެކަނބަލުންނަށް ލަނޑުދިނެވެ. އާދަމު عليه السلام ހީފުޅުކުރެއްވީ އެއްވެސް ފަރާތަކުން މާތް ﷲ ގަންދީ ދޮގު ހުވައި ނުކުރާނެ ކަމަށެވެ. އެހެންކަމުން، އެކަލޭގެ ހުވައިކޮށް ވަސްވާސްދީގެން އެދެކަނބަލުންނަށް އޮޅުވައިލިއެވެ. ދެން، އެދެކަނބަލުން އެގަހުން ފަރިއްކުޅުއްވުމުން، އެދެކަނބަލުންގެ ޢައުރަ ދެކަނބަލުންނަށް ކަޝްފުވިއެވެ. އެހިނދު ދެކަނބަލުން ލަދުފުޅުގެންވަޑައިގަތެވެ. ދެން، ދެކަނބަލުން ޢައުރައިގެ މަތީގައި ސުވަރުގޭގެ ގަހުގެ ފަތް އަޅުއްވަން ފެއްޓެވިއެވެ. އެފަތުން ޢައުރަ ނިވައިކުރެއްވުމަށެވެ. ކުރިން އެދެކަނބަލުންގެ ޢައުރަ މާތް ﷲ ނިވާކުރައްވާފައި ވަނީ ސުވަރުގޭގެ ޒީނަތްތެރިކަމުންނެވެ. ދެކަނބަލުންގެ ޢައުރަމަތީގައި ހުރީ ނޫރެއް ލައްވާފައެވެ. އެއްބޭފުޅަކަށް އަނެއް ބޭފުޅެއްގެ ޢައުރަ ފެނިވަޑައިނުގަންނަވާ ގޮތަށެވެ. އެހިނދު މާތް ﷲ އެދެކަނބަލުންނަށް ގޮވައިލެއްވިއެވެ. އެގަހުން ފަރިއްނުކުޅުއްވުމަށް ތިމަންރަސްކަލާނގެ ތިޔަ ދެކަނބަލުންނަށް އިންޒާރުނުކުރައްވަމުހެއްޔެވެ؟ އަދި ލަޢުނަތްލެއްވި ޝައިޠާނާގެ ޢަދާވާތްތެރިކަމާ، އެކަލޭގެއަކީ ފާޅުގައި ހުރި ޢަދުއްވެއްކަން ތިޔަ ދެކަނބަލުންނަށް ނުއަންގަވަމުހެއްޔެވެ؟ عَنْ اِبْن عَبَّاس , قَالَ :قَالَ (اللهُ لِآدَمَ): أَمَا كَانَ لَك فِيمَا مَنَحْتُك مِنْ الْجَنَّة وَأَبَحْتُكَ مِنْهَا مَنْدُوحَة عَمَّا حَرَّمْت عَلَيْك ؟ قَالَ: بَلَى يَا رَبّ ، وَلَكِنْ وَعِزَّتك مَا حَسِبْت أَنَّ أَحَدًا يَحْلِف بِك كَاذِبًا. (تفسير الطبري، ج: 12، ص: 355) (ޢަބްދުﷲ ބްނު ޢައްބާސް رضي الله عنه ގެ އަރިހުން ރިވާވެގެން ވެއެވެ. މާތް ﷲ އާދަމު عليه السلام އަށް ވަޙީކުރެއްވިއެވެ. "ތިމަން ﷲ ކަލޭގެފާނަށް ދެއްވައި ހުއްދަކުރެއްވި ސުވަރުގޭގެ ގަސްތައް މިގަސް ފިޔަވައި ކަލޭގެފާނަށް ނުފުދުނީ ހެއްޔެވެ؟" އެހިނދު އެކަލޭގެފާނު ދެންނެވިއެވެ! "އިބަރަސްކަލާނގެ ޢިއްޒަތްތެރިކަން ގަންދެއްވަމެވެ. އެހެންނަކުން ނޫނެވެ. މިއަޅާ ހީކުރީ އިބަރަސްކަލާނގެ އެއްވެސް މަޚްލޫޤެއް އިބަރަސްކަލާނގެ ގަންދީ ދޮގުހުވައި ނުކުރާނެކަމަށެވެ.") (ތަފްސީރުއް ޠަބަރީ، ޙަދީޘު: 11198) ދެން، މާތް ﷲ އެކަލޭގެފާނަށް ވަޙީކުރެއްވިއެވެ. ތިމަންރަސްކަލާނގެ ޢިއްޒަތްތެރިކަން ގަންދެއްވައި ވަޙީކުރައްވަމެވެ. ކަލޭގެފާނު ބިމަށް ބާލުއްވާހުށީމެވެ. އެއަށްފަހު، ބުރަ މަސައްކަތް ކުރައްވައިގެން މެނުވީ ކަލޭގެފާނަށް ދިރިނުއުޅުއްވޭނެއެވެ. ދެން އެކަލޭގެފާނު ބާލުއްވައި، ފަސްގަނޑު ޖައްސަވައި ދަނޑުވެރިކަން ކުރައްވަން އެންގެވިއެވެ. އެކަލޭގެފާނު ފަސްގަނޑު ޖައްސަވައި، ދަނޑަށް ފެންދެއްވައި، ފުށްގަނޑު ތައްޔާރުކުރައްވައި ރޮށި ފިއްސެވިއެވެ. ފަހެ، އެކަލޭގެފާނު އަރާމާއި ބާއްޖަވެރިކަމުގެ ދިރިއުޅުއްވުމަކުން، ބުރަ މަސައްކަތާއި އަބާއްޖަވެރިކަމުގެ ދިރިއުޅުމަކަށް ބަދަލުވެވަޑައިގަތެވެ.