وَٱلَّذِينَ ءَامَنُوا۟ وَعَمِلُوا۟ ٱلصَّـٰلِحَـٰتِ وَءَامَنُوا۟ بِمَا نُزِّلَ عَلَىٰ مُحَمَّدٍ وَهُوَ ٱلْحَقُّ مِن رَّبِّهِمْ ۙ كَفَّرَ عَنْهُمْ سَيِّـَٔاتِهِمْ وَأَصْلَحَ بَالَهُمْ ﴿٢﴾ ﴿ ٢ ﴾
ތަރުޖަމާ
އަދި އީމާންވެ، ޞާލިޙު ޢަމަލުތައްކޮށް، އަދި މުޙައްމަދުގެފާނުގެ މައްޗަށް ބާވައިލެއްވި ފޮތް އެއީ، އެއުރެންގެ ވެރިރަސްކަލާނގެ ޙަޟްރަތުން އައި ޙައްޤު ބަސްފުޅުކަމަށް އީމާންވި މީހުން (ދަންނާށެވެ!) އެކަލާނގެ އެއުރެންގެ ކުށްފާފަތައް އެއުރެންގެ ކިބައިން ފުއްސަވައި، އަދި އެކަލާނގެ، އެއުރެންގެ ޙާލުތައް އިޞްލާޙުކުރެއްވިއެވެ. (2)
ތަފްސީރު
އަދި އީމާންވެ ޞާލިޙު ޢަމަލުކޮށް، މުޙައްމަދު ﷺ އަށާއި، އެއީ ޙައްޤު ބަސްފުޅު ކަމުގައިވާ ޙާލު، އެކަލޭގެފާނުގެ މައްޗަށް ބާވައިލެއްވި ކީރިތި ޤުރްއާނަށް އީމާންވި މީހުން ދަންނާށެވެ. ފަހެ، މާތް ﷲ އެބައިމީހުންގެ ކުށްފާފަތައް ފުއްސަވައި އެބައިމީހުންގެ ޙާލު އިޞްލާޙުކުރެއްވިއެވެ. އީމާންކަމުގެ އަހުލުވެރިންނާއި، ކާފިރުކަމާއި ހައްދުފަހަނައަޅައިދިއުމުގެ އަހުލުވެރިންނާ ދެމެދު ރިވެތި އަޅާކިއުމެކެވެ. ފަހެ، މާތް ﷲ ވަނީ އެ ފާފަވެރި ކާފަރުންގެ ޢަމަލުތައް ބާޠިލުކުރައްވާފައެވެ. އަދި އެކަލާނގެ ވަނީ މި ހެޔޮލަފާ މުއުމިނުންގެ ކުށްފާފަތައް ފުއްސަވައި އެބައިމީހުންގެ ޙާލު ރަނގަޅުކުރައްވާފައެވެ. އީމާންވުމުގެ ތެރޭގައި ޖުމްލަކޮށް މުޙައްމަދު ﷺ އަށް އީމާންވުން ހިމެނޭއިރުވެސް، އެކަލޭގެފާނަށް އީމާންވުމުގެ ވާހަކަ ޚާއްޞަކޮށް ގެންނަވާފައި ވަނީ، އެކަލޭގެފަނުގެ ދަރަޖަ މަތިވެރިކުރެއްވުމަށެވެ. އަދި އަހުލުކިތާބީންކަމުގައިވާ ޔަހޫދީންނާއި، ނަޞާރާއިން މުޙައްމަދު ﷺ އަށް ކާފިރުވެފައި ވާތީ އެބައިމީހުން މަގުފުރެދިފައިވާކަން ބަޔާންކުރެއްވުމަށެވެ. ފަހެ، އެބައިމީހުންގެ ރަސޫލުބޭކަލުންނަށް އެބައިމީހުން އީމާންވީކަމުގައި ވިޔަސް އެބައިމީހުން ވާނީ ކާފަރުންނަށެވެ. އެހެނީ، އެންމެ ރަސޫލުބޭކަލަކު ދޮގުކުރި މީހާ ވެސް ވާނީ ހުރިހާ ރަސޫލުބޭކަލުން ދޮގުކުރި މީހަކަށެވެ. އޭނާ ދާނެ ތަނަކީ ނަރަކައެވެ.