قَالَ رَبِّ إِنِّى وَهَنَ ٱلْعَظْمُ مِنِّى وَٱشْتَعَلَ ٱلرَّأْسُ شَيْبًا وَلَمْ أَكُنۢ بِدُعَآئِكَ رَبِّ شَقِيًّا ﴿ ٤ ﴾
ތަފްސީރު
ޙުޝޫޢަތްތެރިކަމާ މަޑުމޮޅިކަމާއެކު ދުޢާކުރައްވަމުން އެކަލޭގެފާނު ދެންނެވިއެވެ. އަޅުގެ ވެރިރަސްކަލާކޮ! އަޅުގެ ކަށި ބަލިކަށިވެއްޖެއެވެ. އަދި ޢުމުރުން ދުވަސްވެ މުސްކުޅިވުމުގެ ސަބަބުން އަޅުގެ ގައިގެ ބާރުދޫވެއްޖެއެވެ. އަދި ހިކި ހުއިގެ ތެރޭގައި އަލިފާން ފެތުރޭހެން އަޅުގެ ބޮލުގައި ނުރަ ފެތުރިއްޖެއެވެ. އަދި އެއްވެސް އިރެއްގައި އިބަރަސްކަލާނގެ މިއަޅާ ނާއުއްމީދު ނުކުރައްވަމުއެވެ. އިބަރަސްކަލާނގެ ހަޟްރަތުން މިއަޅާއަށް އަބަދުވެސް ލިބުނީ ހެޔޮކަމާއި އިޙްސާންތެރިކަމެވެ. އެހެންކަމުން، އަޅުގެ ވެރިރަސްކަލާކޮ! އަޅުގެ ދުޢާ އިޖާބަކުރައްވައިފާނދޭވެ.