ތަފްސީރު
މި ސޫރަތަކީ ޚާލިޞް ގޮތުގައި އެއްކައުވަންތަކުރުމާއެކު، ޝިރުކާއި، ބުދަށް އަޅުކަންކުރުމުން ބަރީއަވުމުގެ ސޫރަތެވެ. މި ސޫރަތް ބާވައިލެއްވި ސަބަބާ ބެހޭގޮތުން ރިވާވެގެން ވެއެވެ. މުޝްރިކުން ރަސޫލުﷲ ﷺ އަށް ޞުލްޙައަށް ގޮވައިލިއެވެ. އަދި ތާކުންތާކު ނުޖެހޭ ޕްލޭނެއް އެކަމަށްޓަކައި ހުށަހެޅިއެވެ. އެއީ އެބައީމީހުން އެކަލޭފާނުގެ ކަލާނގެއަށް އެއް އަހަރު އަޅުކަން ކުރުމާއި، އެބައިމީހުންގެ ކަލާނގެތަކަށް އެކަލޭގެފާނު އެއް އަހަރު އަޅުކަން ކުރެއްވުމެވެ. މައްސަލައަކީ ދެފަރާތުން ދޫދީގެން އެއްބަސްވުމަކަށް އަންނަންޖެހޭ މައްސަލައެއް ފަދައެވެ. ދެން، ރަސޫލުﷲ ﷺ އެބައިމީހުންނަށް ޙަދީޘުކުރެއްވިއެވެ. މާތް ﷲއާއި އެއްވެސް ފަރާތެއް ޝަރީކުރުކުރެއްވުމުން އެކަލާނގެ ރައްކާތެރިކަމަށް އެދިވަޑައިގަންނަވަމެވެ. އެހިނދު އެބައިމީހުން ދެންނެވިއެވެ. ކަލޭގެފާނު އަހަރުމެންގެ ބުދުތަކެއް ހޯއްދަވައިގެން އޭގައި އަތްޕުޅު ބީއްސަވައިލައްވާށެވެ. އޭރުން އަހަރުމެން ކަލޭގެފާނު ތެދުކުރާނަމެވެ. އަދި ކަލޭގެފާނުގެ ކަލާނގެއަށް އަޅުކަންކުރާނަމެވެ. އެހެނަސް ރަސޫލުﷲ ﷺ އެއިން ބުދެއްގައި އަތްޕުޅު ބީއްސެވުމަށްވެސް އަދި އެބުދުތަކަށް ސަނާގެ ބަސްފުޅެއް ވިދާޅުވުމަށް ވެސް އިންކާރުކުރެއްވިއެވެ. ދެން މާތް ﷲ މިސޫރަތް ބާވައިލެއްވިއެވެ. އެހިނދު، ޤުރައިޝު ވަންހައިގެ އަޝްރާފުންނާއި ބޮޑުންގެ ގިނަ ބަޔަކު އަލްމަސްޖިދުލް ޙަރާމްގައި ތިއްބައި ރަސޫލުﷲ ﷺ އެތަނަށް ވަޑައިގަތެވެ. އަދި އެންމެންގެ ތެރޭގައި ހުންނަވައިގެން އެބައިމީހުންނަށް މިސޫރަތް ކިޔަވައިވިދާޅުވެދެއްވިއެވެ. އެހިނދު އެކަލޭގެފާނާއެކު އެއްބަސްވުމަކާ ހަމައަށް އައުމާމެދު އެބައިމީހުން އުއްމީދު ކަނޑައިލިއެވެ. އަދި އެކަލޭގެފާނުގެ އަޞްޙާބުންނަށް އެންމެ ގަދަފަދަ ޢަޛާބު ދޭން ފެށިއެވެ. މާނައީ: ރަސޫލާ ﷺ އެވެ. ކަލޭގެފާނަށް ހިލަތަކަކަށް އަޅުކަންކުރެއްވުމަށް ގޮވާލާ ފާފަވެރި ކާފިރުންނަށް ކަލޭގެފާނު ވިދާޅުވާށެވެ. ރަޙްމާނުވަންތަ ރަސްކަލާނގެ ފިޔަވައި ތިޔަބައިމީހުން ތިޔަ އަޅުކަންކުރާ ބުދުތަކަށް ތިމަންކަލޭގެފާނު އަޅުކަމެއް ނުކުރައްވަމެވެ. އަދި ތިޔަބައިމީހުންގެ ކިބައިންނާއި، ތިޔަބައިމީހުންގެ ކަލާނގެތަކާއި، ތިޔަބައިމީހުން އަޅުކަންކުރާ ތަކެތީގެ ކިބައިން ތިމަންކަލޭގެފާނު ބަރީއަވެގެން ވަމެވެ. އެތަކެއްޗަކީ ފައިދާއެއް އަދި ގެއްލުމެއްވސް ނުދެވޭ، އެތަކެއްޗަށް ދުޢާކުރާ މީހެއް އަދި އެ ނަގައި އެއްލާލާ މީހެއް ވަކިނުކުރެވޭ ތަކެއްޗެވެ.