ފަހެ، ކަލޭގެފާނުގެ ވެރިރަސްކަލާނގެއަށް ކަލޭގެފާނު ނަމާދު ކުރައްވާށެވެ! އަދި قربان ކުރައްވާށެވެ! (2)

ކަލޭގެފާނަށް އެކަލާނގެ ދީލަތިވަންތަކަމުން ގިނަ ނިޢުމަތްތަކެއް ދެއްވި، ކަލޭގެފާނުގެ ވެރިރަސްކަލާނގެއަށް އެކަނި ކަލޭގެފާނު ނަމާދުކުރައްވާށެވެ. އަދި އެކަލާނގެ ވަޖުހުފުޅަށްޓަކައި އެކަނި ޖަމަލު ކަތިލައްވާށެވެ. އަދި ކަލޭގެފާނުގެ ހުރިހާ ޢަމަލެއް އެކަލާނގެއަށް ޚާލިޞްކުރައްވާށެވެ. ކަލޭގެފާނަށް ދެއްވި ގިނަގުނަ ނިޢުމަތަށްޓަކައި އެކަލާނގެއަށް ޝުކުރުވެރިވެވަޑައިގަތުމަށްޓަކައެވެ. ٱلْكَوْثَرَ ގެ މާނައަކީ ގިނަވެގެންވާ ހެޔޮކަމެވެ. އެއީ الكثرة އިން އައިސްފައިވާ މުބާލަޣާގެ ލަފުޒެކެވެ. މި ކަލިމައިގެ މާނަ ފެން އާރުގެ ގޮތުގައި ކުރެއްވި ބޭފުޅުން އެ ނެންގެވީ މާނައިގެ ބައެކެވެ. އިބްނު ޢައްބާސް رضي الله عنه ގެ އަރިހުން އަލްބުޚާރީ ރިވާކުރެއްވިއެވެ. އަލްކައުޘަރުގެ ތަފްސީރުގައި އެކަލޭގެފާނު ވިދާޅުވިއެވެ. "އެއީ އެކަލޭގެފާނަށް މާތް ﷲ ދެއްވި ގިނަވެގެންވާ ހެޔޮކަމެވެ." ޙަދީޘު ރިވާކުރެއްވި ބިޝްރު ވިދާޅުވިއެވެ. ތިމަން ސަޢީދު ބްނު ޖުބައިރުއަށް ދެންނެވީމެވެ. އެއީ ސުވަރުގޭގައިވާ ކޯރެއް ކަމުގައި މީހުން ބުނެއުޅެއެވެ. އެހިނދު އިބްނު ޖުބައިރު ވިދާޅުވިއެވެ. ސުވަރުގޭގައިވާ ކޯރަކީ މާތް ﷲ އެކަލޭގެފާނަށް ދެއްވި ހެޔޮކަމުގެ ތެރެއިން ވާ ކޯރެކެވެ. (ޞަޙީޙުލް ބުޚާރީ، ޙަދީޘު: 6578)

ހަމަކަށަވަރުން، ކަލޭގެފާނު ކޯފާއިސްކުރައްވާ މީހާ އެއީ، ހުރިހާ ހެޔޮކަމަކުން ކެނޑިގެންވާ މީހާއެވެ. (3)

ހަމަކަށަވަރުން ކަލޭގެފާނުދެކެ ރުޅިއަންނަ މީހާ އެއީ ހުރިހާ ހެޔޮ ކަމަކުން ކެނޑިގެންވާ މީހާއެވެ. މިއާޔަތް ބާވައިލެއްވީ އަލްޢާޞް ބުން ވާއިލާ ބެހޭގޮތުންނެވެ. އޭގެ ސަބަބަކީ ނަބިއްޔާ ﷺ ގެ ދަރިކަލުން އަލްޤާސިމް އަވަހާރުވުމުން އެއަބާއްޖަވެރިޔާ ބުންޏެވެ. އެކަލޭގެފާނު ދޫކޮށްލާށެވެ. އެކަލޭގެފާނަކީ ނަސްލު އެކަލޭގެފާނާ ހަމައިން ކެނޑިފައިވާ ބޭކަލެކެވެ. އެކަލޭގެފާނު އަވަހާރަވުމުން އެކަލޭގެފާނުގެ ވާހަކަ އެހާހިސާބުން ނިމުނީއެވެ. ދެން މާތް ﷲ އެކަލާނގެ ރަސޫލާ ﷺ ގެ ދިފާޢުގައި މި ސޫރަތް ބާވައިލެއްވިއެވެ. އަދި އެއްވެސް ހެޔޮކަމެއް ނެތް، ޢިއްޒަތްތެރިވަންތަ، މަތިވެރިވަންތަ ﷲގެ ރަޙްމަތުން ކެނޑިފައިވާމީހަކީ އެ ފާފަވެރި ކާފިރުމީހާ ކަން އެކަލާނގެ އެންގެވިއެވެ. ދެން ރަސޫލުﷲ ތޯއެވެ؟ އެކަލޭގެފާނުގެ ޒިކުރު ފަހުދުވަހާ ޖެހެންދެން ދެމިގެން ދާނެއެވެ. އަދި އެކަލޭގެފާނުގެ ނަންފުޅު މާތް ﷲގެ އިސްމުފުޅާއެކު (ޝަހާދަތުގެ ދެކަލިމަ لَا إِلَهَ إِلاَّ اللهُ مُحَمَّدٌ رَسُولُ اللهِ ގައި) މުންނާރުތަކާއި، މިންބަރުތަކުން އުފުލޭނެއެވެ. އަދި ޤިޔާމަތާ ޖެހެންދެން އަންނަ މުއުމިނުންނަކީ އެކަލޭގެފާނުގެ ދަރިންނާއި، އެކަލޭގެފާނަށް ނަޞްރުދޭ މީހުންނާއި، އެކަލޭގެފާނަށް ތަބަޢަވާ މީހުންނެވެ. އެކަލޭގެފާނު ވަނީ އެބޭކަލުންގެ ބަފައިކަލުން ފަދައިންނެވެ. ﴿النَّبِىُّ أَوْلَىٰ بِٱلْمُؤْمِنِينَ مِنْ أَنفُسِهِمْ﴾ (މުއުމިނުންނަށް އެއުރެންގެ އަމިއްލަ ނަފްސުތަކަށްވުރެން، ނަބިއްޔާ އައުލާކަން ބޮޑެވެ.) މާތް ﷲ އެކަލޭގެފާނަށް ތާއަބަދު ޞަލަވާތާއި ސަލާމް ލައްވާށިއެވެ. މާތް ﷲ ނަބިއްޔާ ﷺ އަށް ދެއްވި ގިނަވެގެންވާ ހެޔޮކަމުގެ ތެރޭގައި ހިމެނޭ ކައުޘަރު ކިޔުނު އާރާއި ބެހޭގޮތުން މަޝްހޫރު ގިނަ ޙަދީޘުތަކެއް އައިސްފައި ވެއެވެ. އޭގެ ތެރޭގައި އައްތިރްމިޛީ އެކަލޭގެފާނުގެ ސުނަނުގައި ރިވާކުރައްވާފައިވާ މި ޙަދީޘު ހިމެނެއެވެ. عَنْ عَبْدِ اللَّهِ بْنِ عُمَرَ، قَالَ قَالَ رَسُولُ اللَّهِ صلى الله عليه وسلم ‏ "‏الْكَوْثَرُ نَهْرٌ فِي الْجَنَّةِ حَافَّتَاهُ مِنْ ذَهَبٍ وَمَجْرَاهُ عَلَى الدُّرِّ وَالْيَاقُوتِ تُرْبَتُهُ أَطْيَبُ مِنَ الْمِسْكِ وَمَاؤُهُ أَحْلَى مِنَ الْعَسَلِ وَأَبْيَضُ مِنَ الثَّلْجِ"‏‏. (جامع الترمذي، كتاب تفسير القرآن عن رسول الله صلى الله عليه وسلم) (ޢަބްދުﷲ ބިން ޢުމަރުގެ އަރިހުން ރިވާވެގެން ވެއެވެ. އެކަލޭގެފާނު ވިދާޅުވިއެވެ. ރަސޫލުﷲ ﷺ ޙަދީޘުކުރެއްވިއެވެ. ކައުޘަރަކީ ސުވަރުގޭގައިވާ ކޯރެކެވެ. އެކޯރުގެ ދެ އައްސޭރި ވަނީ ރަނުންނެވެ. އެކޯރު ހިނގަނީ ރަންމުތާއި ޔާޤޫތުގެ މަތީގައެވެ. އެކޯރުގެ ވެލީގައި ގޮމަކަސްތޫރިއަށް ވުރެ މީރުވަސް ދުވައެވެ. އެކޯރުގެ ފެން މާމުޔަށްވުރެ ފޮންޏެވެ. އަދި ގަނޑުފެނަށްވުރެ ހުދެވެ.) (ޖާމިޢުއް ތިރްމިޛީ، ޖ: 5، ޙަދީޘު: 3361) އަދި އަލްބުޚާރީ، އަނަސް t ގެ އަރިހުން ރިވާކުރައްވާފައި ވެއެވެ. ނަބިއްޔާ ﷺ ޙަދީޘުކުރެއްވިއެވެ. "‏أَتَيْتُ عَلَى نَهَرٍ حَافَتَاهُ قِبَابُ اللُّؤْلُؤِ مُجَوَّفًا فَقُلْتُ مَا هَذَا يَا جِبْرِيلُ قَالَ هَذَا الْكَوْثَرُ‏"‏‏.‏ (صحيح البخاري، كتاب التفسير) ((މިޢުރާޖު އަރައިވަޑައިގަތް ރޭ) ތިމަންކަލޭގެފާނު ކޯރެއްގެ ކައިރިއަށް ވަޑައިގަތީމެވެ. އެކޯރުގެ ދެ އައްސޭރީގައިވަނީ އެތެރެ ހުސްކޮށް ހުރި ރަންމުތުގެ ގުއްބަތަކެކެވެ. ދެން ތިމަންކަލޭގެފާނު ދެންނެވީމެވެ. ޖިބްރީލު عليه السلام އެވެ. މިއީ ކޮންތަނެއް ހެއްޔެވެ؟ އެކަލޭގެފާނު ވިދާޅުވިއެވެ. މިއީ ކައުޘަރެވެ.) (ޞަޙީޙުލް އަލްބުޚާރީ، ޙަދީޘު: 4964) އަޅަމެންގެ ވެރިރަސްކަލާކޮ! ކައުޘަރޭ ކިއުނު އާރުން، އެބުއިމަށް ފަހު ދުވަހަކުވެސް އަޅަމެންގެ ކަރު ނުހިއްކާނޭ ބޯން ފަސޭހަ ބުއިމެއް ދެއްވާނދޭވެ. އިބަރަސްކަލާނގެއީ އެންމެ ރަޙްމަތްވަންތަ ރަސްކަލާނގެއެވެ. އަދި އިބަރަސްކަލާނގެ އެބޭކަލަކަށް އަލްމަޤާމުލް މަޙްމޫދު ޚާއްޞަކުރެއްވި، އަދި ޙައުޟާއި ކައުޘަރު ދެއްވި، އެންމެ ފަހުގެ ނަބިއްޔާއަށް ސަލާމާއި ޞަލަވާތް ލައްވާނދޭވެ! އާމީން.