ފަހެ، އެއީ يتيم ކުއްޖާ ކޮއްޕައި ދުރަށްލާ މީހާއެވެ. (2)

އެއީ އަނިޔާވެރިކަމާ، ހަރުކަށިކަމާއެކު ޔަތީމު ކުއްޖާ ކޮއްޕާ ދުރަށްލައި، އޭނާއަށް އަނިޔާވެރިވެ، އޭނާގެ ޙައްޤު ނުދީ ހިފަހައްޓާ ގަދަފަދަ، ހަރުކަށި މީހާއެވެ.

އަދި مسكين ންނަށް ކާންދިނުމުގެ މައްޗަށް ބާރުނާޅާ މީހާއެވެ. (3)

މާނައީ އޭނާ ހެޔޮކަމެއް ނުކުރެއެވެ. އަދި އިޙްސާންތެރިވުމަށް އަނެކުންނަށް ހިތްވަރު ނުދެއެވެ. މިއީ ދަށު ދަރަޖައަށް ވެއްޓުމުގެ އިންތިހާއެވެ. އެހެނީ، ޔަތީމުންނަށް ކާންދިނުމަށް އަނެކުންނަށް ހިތްވަރު ނުދޭއިރު، އޭނާ އަމިއްލައަށް ކާންދޭނީ ކިހިނަކުން ހެއްޔެވެ؟

-

-

ފަހެ، އެއުރެންގެ ނަމާދާމެދު غافل ވެ ތިބެ، ނަމާދުކުރާ މީހުންނަށް ގެއްލުމާއި ހަލާކު ހުށްޓެވެ. (4-5)

ފަހެ، އެބައިމީހުންގެ ވިޔަފާރީގައި މަޝްޣޫލުވުމުގެ ސަބަބުން ނަމާދާ މެދު ފަރުވާކުޑަކޮށް، ނަމާދު އޭގެ ވަގުތަށްވުރެ ފަސްކުރާ މީހުންނަށް ހަލާކާއި، ޢަޛާބާއި، ސުންނާފަތިކަން ހުށްޓެވެ. މިއީ މުނާފިޤުންގެ ސިފައެވެ. އެބައިމީހުން ނަމާދުކުރަނީ ދެއްކުންތެރިކަމާއި، މަޝްހޫރުކަމަށްޓަކައެވެ. ނަމާދަކަށް އެބައިމީހުން މުހިއްމުކަމެއް ނުދެއެވެ. އިބްނު ޢައްބާސް رضي الله عنه ވިދާޅުވިއެވެ. އެއީ ނަމާދު ކުރިއަސް އެނަމާދުން ދަރުމަ ލިބުމަށް ނޭދޭ އަދި ނަމާދު ދޫކޮށްލިއަސް ޢަޛާބު ލިބޭނެކަމަށް ބިރުވެތިނުވާ މީހާއެވެ. އެނާގެ ހިތް އީމާންކަމުން ހުސްވެފައި ވާތީއެވެ. މީގެ ދަލީލަކީ ދެން އަންނަ ވަޙީ ބަސްފުޅެވެ.

އެއުރެންނީ، ހަމަ، ކަންދެއްކުމަށް ނަމާދުކުރާ މީހުންނެވެ. (6)

-

އަދި ހިފައިގެންގުޅޭ ތަކެތި މީހުންނަށްނުދީ، މަނާކުރާ މީހުންނެވެ. (7)

އެބައިމީހުންނީ ދެއްކުންތެރި މުނާފިޤުންނެވެ. އެބައިމީހުން ނަމާދުކުރަނީ ހެޔޮލަފާކަމާއި ތަޤްވާވެރިކަން ދައްކަންވެގެން ދެއްކުންތެރިކަމުގެ ގޮތުންނެވެ. އަދި މީސްތަކުންނަށް ބޭނުންވާ ތިނޯހާއި، ކޯރާޑީއާއި، ތެއްޔާއި، ކާއެތިކޮޅު ފަދަ އާދައިގެ ތަކެތިވެސް ނުދީ މަނާކުރާ މީހުންނެވެ. ﴿ٱلْمَاعُونَ﴾ އަކީ އެއިން އަނެކަކަށް ބޭނުން ހިފޭ ކޮންމެ އެއްޗެކެވެ. މިއާޔަތްތަކުން އެއީ މުނާފިޤުންނާ ބެހޭ އާޔަތްތަކެއްކަން ދަލީލުކޮށްދެއެވެ. އަނަސު رضي الله عنه ގެ އަރިހުން ރިވާވެގެންވާ ޙަދީޘެއްގައި ނަބިއްޔާ ﷺ ޙަދީޘުކުރެއްވިއެވެ. "تِلْكَ صَلَاةُ الْمُنَافِقِ ، يَجْلِسُ يَرْقُبُ الشَّمْسَ حَتَّى إِذَا كَانَتْ بَيْنَ قَرْنَيِ الشَّيْطَانِ قَامَ فَنَقَرَأَرْبَعًا لَا يَذْكُرُاللَّهَ فِيهَا إِلَّا قَلِيلًا" (صحيح مسلم، كتاب الْمَسَاجِدِ وَمَوَاضِعِ الصَّلاَةِ، باب اسْتِحْبَابِ التَّبْكِيرِ بِالْعَصْرِ) (އެއީ މުނާފިޤުމީހާގެ ނަމާދެވެ. އޭނާ އިންނާނީ އިރަށް ބަލަބަލައެވެ. ދެން އިރުގޮސް ޝައިޠާނާގެ ދެދަޅުގެ ދެމެދަށް ތިރިވުމުން ތެދުވެ ދޫނި ތުންތަޅާހެން ހަތަރު ރަކްޢަތް ކޮށްލާނެއެވެ. (އެކަލޭގެފާނުގެ މުރާދަކީ ޢަޞްރު ނަމާދެވެ.) އޭގައި މަދުން ނޫނީ އޭނާ މާތް ﷲއަށް ޒިކުރު ނުކުރާނެއެވެ.) (ޞަޙީޙު މުސްލިމް، ޙަދީޘު: 662) އިހުގެ ބައެއް ޢިލްމުވެރިން ވިދާޅުވެފައި ވެއެވެ. فِي صَلَاتِهِمْ އޭ ވަޙީނުކުރައްވައި ﴿عَن صَلَاتِهِمْ سَاهُونَ﴾ އޭ ވަޙީކުރެއްވި ﷲއަށް ޙަމްދު ހުށްޓެވެ. އެހެންނޫންނަމަ، މީސްތަކުން ހަލާކުވެއްޖައީހެވެ. އެހެނީ ހަނދާން ނުނެތޭ އެކަކުވެސް ނުހުންނާނެއެވެ.