ހިތްތަކަށް ބިރުވެރިކަންގެނެސްދޭ قيامة ދުވަހަކީ، ކޮންދުވަހެއް ހެއްޔެވެ؟ (2)

ސުވާލު އައިސްފައިވަނީ ކަމުގެ ބޮޑުކަން އެންގެވުމަށެވެ. މާނައީ: ޤިޔާމަތަކީ ކޮން އެއްޗެއްކަން ކަލޭގެފާނަށް އެނގިވަޑައިގަންނަވާތޯއެވެ؟ އެއީ ތަޞައްވަރުކޮށް ޚިޔާލުކުރެވޭ ވަރަށްވުރެ މަތީގައިވާ ކަމެކެވެ. އަދިވެސް އިތުރަށް އެދުވަހުގެ ބިރުވެރިކަން ބޮޑުކަން އެންގެވުމަށް ވަޙީކުރައްވަނީ

އަދި ހިތްތަކަށް ބިރުވެރިކަން ގެނެސްދޭ قيامة ދުވަހަކީ، ކޮންދުވަހެއްކަން ކަލޭގެފާނަށް އަންގައިދިނީ ކޮންއެއްޗެއްތޯއެވެ؟ (3)

ހިތްތަކަށް ބިރުވެރިކަން ވައްދާ ދުވަހަކީ ކޮން އެއްޗެއްކަން ކަލޭގެފާނަށް އެނގިވަޑައިގަންނަވާތޯއެވެ؟ ހަމަކަށަވަރުން ޢިއްޒަތްތެރިކަމާއި މަތިވެރިވަންތަކަމުގެ ވެރިރަސްކަލާނގެ ފިޔަވައި އެއްވެސް ފަރާތަކަށް އެދުވަހުގެ ޙަޤީޤަތާއި، އެދުވަހުގެ ބިރުވެރިކަމުގެ މިންވަރު އެނގިގެން ނުވެއެވެ. އެދުވަހުގެ ބިރުވެރިކަން ވަންނަނީ ހިތްތަކަށް އެކަންޏެއް ނޫނެވެ. އެބިރުވެރިކަން މުޅިކައުނަށް ފެތުރިގެން ދެއެވެ. ތަރިތަކާއި، އުޑާއި، ފަރުބަދަތަކާއި، ކަނޑުތަކަށެވެ. އަދި އިންސާނާއަށް ފެންނަ ކޮންމެ އެއްޗަކަށެވެ. ދެން އެދުވަހުގެ ބިރުވެރި ބައެއް ޙާދިޘާތައް ބަޔާންކުރައްވަމުން ވަޙީކުރައްވަނީ

ވިއްސިވިހާލިވެގެންދާ ކޮކާތަކެއް ފަދައިން މީސްތަކުންވާނޭ ދުވަހެވެ. (4)

ބިރުގަނެފައިވާ ޙާލު މީސްތަކުން ކަށްވަޅުތަކުން ނުކުންނަ ދުވަހެވެ. އެބައިމީހުން ތިބޭނީ ވިއްސިވިހާލިވެފައިވާ ކޮކާތަކެއް ފަދައިންނެވެ. އެއްބަޔަކު އަނެއް ބައެއްގެ މައްޗަށް އުތުރިއަރާ ޙާލު، ބިރުވެރިކަން ބޮޑުކަމުން ދެވޭ ނުދެވޭ ތަނެއް ނޭނގި، ހަދާނެ ގޮތެއް ނޭނގިފައެވެ. މާތް ﷲ އެބައިމީހުން ސިފަކުރެއްވީ އުދުހިގަތުމަށް ފަހު ދެވޭތަނެއް އެއަށް ނޭނގި ދަތުރުކުރާ ކޮކާތަކެއްގެ ގޮތުގައެވެ. ޤިޔާމަތްދުވަހު މީސްތަކުންގެ ޙާލަކީވެސް އެއީއެވެ. އެއްބަޔަކު އަނެއް ބައެއްގެ މައްޗަށް އުތުރިއަރާ ޙާލުގައެވެ. މާތް ﷲ ވަޙީކުރައްވާފައިވާ ފަދައިންނެވެ. ﴿وَتَرَكْنَا بَعْضَهُمْ يَوْمَئِذٍ يَمُوجُ فِى بَعْضٍ﴾ (އެދުވަހުން، ތިމަންރަސްކަލާނގެ އެއުރެންގެ އެއްބަޔަކު އަނެއްބަޔެއްގެ މައްޗަށް އުތުރިއަރާގޮތަށް ދޫކޮށްލައްވާހުށީމެވެ.)

އަދި ބުރުވައިލެވޭ ކެހެރިތަކެއް ފަދައިން ފަރުބަދަތައް ވާނޭދުވަހެވެ. (5)

އަދި ފަރުބަދަތައް ވައިގެތެރެއަށް ބުރައި، އުދުހިގެންދާ ކެހެރިތައް ފަދައިން ވާނޭ ދުވަހެވެ. ٱلْعِهْن ގެ މާނައަކީ ކެހެރިއެވެ. ފަރުބަދައިގެ ތަފާތު ކުލަތައް ވެއެވެ. ހުދުކުލައާއި، ރަތްކުލައާއި، ކަޅުކުލައެވެ. ފަރުބަދަތައް ބުރަބުރައިގެން ވަޔަށް އަރައިގެން ދާއިރު ވައްތަރު ވަނީ ތަފާތު ކުލައިގެ ކެހެރިއާއެވެ. މިއީ ފަރުބަދަތަކުގެ ޙާލުކަމުގައި ވާއިރު، މީސްތަކުންގެ ޙާލު ކިހިނެއް ވާނޭ ހެއްޔެވެ؟

ފަހެ، އެމީހެއްގެ (ހެޔޮކަންތަކުގެ) ތިލަފަތް ބަރުވެއްޖެމީހާ ދަންނާށެވެ! (6)

-

ފަހެ، އެމީހާ ވާހުށީ، ރުހިގެންވާ ދިރިއުޅުމެއްގައެވެ. (އެބަހީ: ސުވަރުގޭގައެވެ.) (7)

ފަހެ، އޭނާގެ ނުބައިކަންތަކަށްވުރެ، ހެޔޮކަންތައް ބަރުވެއްޖެ މުއުމިން މީހާ ދަންނާށެވެ. އޭނާ އެދުވަހުން ވާނީ އަރާމާއި، ބާއްޖަވެރިކަމާއި، އުފަލުގައެވެ. އެ ޢަމަލުތަކުގެ ވެރިމީހާ އެޢަމަލުތަކާ މެދު އުފާކުރާނެއެވެ. އޭނާވާނީ ދެމިތިބުމުގެ ސުވަރުގޭގެ ނިޢުމަތުގައި ކަމަށްވާތީއެވެ.

އަދި އެމީހެއްގެ ތިލަފަތް ލުއިވެއްޖެމީހާ ދަންނާށެވެ! (8)

-

ފަހެ، އޭނާ އުޅޭނެތަނަކީ، ނަރަކައިގެ އަޑިއެވެ. (9)

އެމީހެއްގެ ހެޔޮކަންތަކަށްވުރެ ނުބައިކަންތައް ގިނަވެ، މާތް ﷲއަށް އީމާން ނުވާ ކާފިރެއްގެ ގޮތުގައި ހުރި މީހާ ދަންނާށެވެ. ފަހެ، އޭނާގެ ނިމުންވާ ތަނަކީ އަދި އޭނާ އުޅޭނޭ ތަނަކީ ނަރަކައިގެ އަޑިއެވެ. އޭނާ ޤަރާރުވާނެ އެހެން ތަނެއް ނުވެއެވެ. އެއީ، އަބާއްޖަވެރި ފާފަވެރިން ތިބޭނޭ ތަނެވެ. މަންމައަކު އޭނާގެ ދަރިން ގާތްކޮށްލާ ފަދައިން، ނަރަކަ އެބައިމީހުން ގާތްކޮށްލާނެއެވެ.

އަދި އެއީ ކޮންއެއްޗެއްކަން ކަލޭގެފާނަށް އަންގައިދިނީ ކޮންއެއްޗެއްތޯއެވެ؟ (10)

-

އެއީ އަނދައަނދާހުންނަ ނަރަކައިގެ އަލިފާނެވެ. (11)

ނަރަކައިގެ އެންމެ އަޑިއަކީ ކޮން އެއްޗެއްކަން ކަލޭގެފާނަށް އަންގައިދިނީ ކޮން އެއްޗެއް ހެއްޔެވެ؟ އެއީ އަނދައަނދައިހުންނަ، ހޫނު ގަދަކަމުގެ އިންތިހާގައިވާ އަލިފާނެވެ. މާތް ﷲ ނަރަކައިގެ އަލިފާނުން އަހަރުމެން މިންޖުކުރައްވާށިއެވެ.